پرەزيدەنت جولداۋىندا قويىلعان مىندەتتەرگە سايكەس ۇكىمەت تاۋار نارىقتارىندا اشىقتىق پەن باسەكەلەستىك ورناتۋ باعىتىندا كەشەندى شارالاردى قابىلداپ جاتىر, دەپ حابارلايدى ساۋدا جانە ينتەگراتسيا مينيسترلىگى.
2024 جىلعى جەلتوقساندا نارىقتىڭ اشىق جۇمىس ىستەۋ ەرەجەلەرىن قالىپتاستىرۋ ءۇشىن «بيرجالىق ساۋدا تۋرالى» زاڭ قابىلداندى. قۇجات باسەكەلەستىك ورتانى دامىتۋعا باعىتتالعان.
زاڭ اياسىندا «الەۋمەتتىك ماڭىزى بار بيرجالىق تاۋار» ۇعىمى ەنگىزىلدى. ساۋدا جانە ينتەگراتسيا ءمينيسترى ارمان شاققاليەۆتىڭ ايتۋىنشا, بۇل نورمانىڭ ماڭىزى زور:
«الەۋمەتتىك ماڭىزى بار بيرجالىق تاۋار ەنەرگەتيكالىق جانە ازىق-ت ۇلىك قاۋىپسىزدىگىن قامتاماسىز ەتۋ ءۇشىن شەشۋشى ءرول اتقارادى. بۇل الىپساتارلىقتى جويىپ, باعانى اشىق بەلگىلەۋگە جانە ىشكى نارىقتى تۇراقتى قامتاماسىز ەتۋگە كەپىلدىك بەرەدى», – دەدى مينيستر.
سونىمەن قاتار الەۋمەتتىك ماڭىزى بار تاۋارلارمەن ساۋدا جۇرگىزۋگە ۋاكىلەتتى بيرجالاردى كونكۋرستىق ىرىكتەۋ تەتىگى ەنگىزىلدى. بۇل اففيليرلەنگەن قۇرىلىمداردىڭ پايدا بولۋىنا جول بەرمەي, بارلىق قاتىسۋشىعا ساۋدا الاڭدارىنا تەڭ قول جەتكىزۋگە مۇمكىندىك بەرەدى.