بۇگىن قىرعىزستاندا قازاق-قىرعىز جاستار فورۋمىنىڭ اياسىندا ۇلى عالىم, ەتنوگراف شوقان ءۋاليحانوۆتىڭ ءومىرى مەن ەڭبەگىنە ارنالعان دەرەكتى ءفيلمنىڭ تانىستىرىلىمى ءوتتى, دەپ حابارلايدى Egemen.kz.
قر مادەنيەت جانە اقپارات ءمينيسترى ايدا بالاەۆانىڭ ايتۋىنشا, فيلمدە ۇلى عالىمنىڭ قىرعىز حالقىنىڭ تاريحى مەن ەتنوگرافياسىن زەرتتەۋگە قوسقان ۇلەسى مەن «ماناس» ەپوسىن ناسيحاتتاۋداعى ەڭبەگى كەڭىنەن قامتىلعان.
«الەمدىك دەڭگەيدەگى رۋحاني قازىنا سانالاتىن «ماناس» ەپوسىن العاش رەت حاتقا ءتۇسىرىپ, عىلىمي ورتاعا ۇسىنعان تۇلعا – شوقان ءۋاليحانوۆ ەدى. سونداي-اق ونىڭ «ىستىقكولگە ساپار كۇندەلىگى» قازاق پەن قىرعىز حالىقتارىنىڭ عىلىمداعى جانە رۋحانياتتاعى بىرلىگىنىڭ ايقىن كۋالىگى», دەپ جازدى مينيستر.
ايتا كەتەيىك, فورۋمعا قىرعىز رەسپۋبليكاسىنىڭ مەملەكەتتىك حاتشىسى مارات يمانقۇلوۆ قاتىسىپ, شارانىڭ مارتەبەسىن ارتتىردى.
ء«بىزدىڭ ەلدەردىڭ جاستارى ءدال وسىنداي ۇلى تۇلعالاردىڭ مۇراسىنان شابىت الىپ, مەملەكەتتەرىمىز اراسىنداعى ىنتىماقتاستىقتى نىعايتا تۇسەتىنى قۋانتادى», دەدى ايدا بالاەۆا.