قىتايدىڭ گۋانچجوۋ قالاسىندا ورنالاسقان Kaiwa Technology كومپانياسى ادام بالاسىن جاساندى جولمەن دۇنيەگە اكەلەتىن جاڭا تەحنولوگيانى تانىستىردى. ينجەنەرلەردىڭ ايتۋىنشا, بۇل جوبا ايەلدى اۋىر جۇكتىلىكتەن تولىقتاي بوساتىپ, ۇرپاق اكەلۋدىڭ تىڭ مۇمكىندىگىن اشادى, دەپ جازادى Egemen.kz.
كومپانيا ماماندارى دايىنداپ جاتقان «تۋىلۋ ماشيناسىندا» بالا جاساندى جاتىردا دامىپ, قاجەتتى قورەكتىك زاتتاردى پۋپوۆينا قىزمەتىن اتقاراتىن تۇتىك ارقىلى الادى. بۇل قۇرىلعىنى عالىمدار قاراپايىم ينكۋباتور رەتىندە ەمەس, ادامعا بارىنشا ۇقساس گۋمانويدتى روبوتقا ەنگىزۋدى كوزدەپ وتىر. ناتيجەسىندە روبوت اداممەن ءوزارا ارەكەتتەسە الاتىن «جۇكتى اندرويد» بەينەسىندە جۇمىس ىستەمەك.
زەرتتەۋشىلەردىڭ بولجامىنشا, بۇل عاجايىپ تەحنيكا كەلەسى جىلى نارىققا شىعۋى مۇمكىن. ال باعاسى 100 مىڭ يۋاننان (شامامەن 14 مىڭ اقش دوللارى) اسپايدى دەپ جوسپارلانۋدا.
جوبا جاريالانعان ساتتەن باستاپ قوعامدا ءتۇرلى پىكىر تۋدى. ءبىرى – تەحنولوگيانى مەديتسيناداعى ۇلكەن سەرپىلىس دەپ باعالاسا, ەندى ءبىرى – ەتيكالىق جانە زاڭدىق ماسەلەلەرگە الاڭداۋلى. ازىرگە كومپانيا وكىلدەرى قۇرىلعىنى جەتىلدىرۋ ۇستىندە.