پرەزيدەنت جولداۋىنداعى تاپسىرمالاردى ورىنداۋ جانە دەنساۋلىق ساقتاۋ ساپاسىن ارتتىرۋ باعىتىندا ۇكىمەت كەشەندى شارالاردى جۇزەگە اسىرىپ كەلەدى. سونىڭ ناتيجەسىندە حالىق دەنساۋلىعىنىڭ نەگىزگى كورسەتكىشتەرى جاقسارىپ, انا مەن بالا ءولىمى ەداۋىر ازايدى, دەپ جازادى Egemen.kz.
دەنساۋلىق ساقتاۋ ءمينيسترى اقمارال ءالنازاروۆانىڭ ايتۋىنشا, مەملەكەتىمىزدىڭ باستى باسىمدىقتارىنىڭ ءبىرى – حالىقتىڭ دەنساۋلىعىن قورعاۋ. ء«بىزدىڭ ماقساتىمىز – 2029 جىلعا قاراي قازاقستاندىقتاردىڭ ورتاشا ءومىر ءسۇرۋ ۇزاقتىعىن 77 جاسقا جەتكىزۋ. بۇل مەجەگە جەتۋ قولجەتىمدى. جىل سايىنعى ديناميكادا وڭ كورسەتكىشتەر بايقالادى. 2024 جىلدىڭ قورىتىندىسى بويىنشا حالىقتىڭ ورتاشا ءومىر ءسۇرۋ ۇزاقتىعى العاش رەت 75 جاستان استى», دەدى مينيستر.
مينيسترلىك مالىمەتىنشە, وتكەن جىلى انا ءولىمى كورسەتكىشى 12 پايىزعا تومەندەپ, تاريحي مينيمۋمعا جەتتى. سونىمەن قاتار نەوناتالدىق ءولىم 20 پايىزعا, ءسابي ءولىمى 11 پايىزعا, ال بالا ءولىمى 8 پايىزعا ازايدى.
مۇنداي وڭ ناتيجەلەر جاڭا تەحنولوگيالاردى ەنگىزۋمەن دە تىكەلەي بايلانىستى. 2024 جىلى ەلىمىزدە العاش رەت «فەتالدى مەديتسينا» ءادىسى قولدانىلىپ, 71 جاتىرىشىلىك وتا جاسالدى. سونىڭ ارقاسىندا 96 نارەستەنىڭ ءومىرى ساقتالىپ قالدى. بۇدان بولەك, جاڭا تۋعان سابيلەر حيرۋرگياسى دا قارقىندى دامىپ كەلەدى: 2025 جىلدىڭ العاشقى جارتىجىلدىعىندا تۋا بىتكەن دامۋ اقاۋلارى بار 600 نارەستەگە وتا جاسالعان.
«مەملەكەت باسشىسى مەن ۇكىمەتتىڭ قولداۋىنىڭ ارقاسىندا ءبىز حالىق دەنساۋلىعىن جاقسارتۋعا باعىتتالعان شارالاردى جۇيەلى تۇردە جۇرگىزىپ كەلەمىز», دەپ اتاپ ءوتتى اقمارال ءالنازاروۆا.