مەملەكەت باسشىسى «قازمۇنايگاز» ۇك» اق باسقارما توراعاسى اسحات حاسەنوۆتى قابىلدادى

اسحات حاسەنوۆتىڭ ايتۋىنشا, «قازمۇنايگاز» گەولوگيالىق بارلاۋ جۇمىستارىن بەلسەندى جۇرگىزىپ كەلەدى. بيىل قولدانىستاعى كەن ورىندارىن قوسىمشا بارلاۋ ءۇشىن جەتى ۇڭعىمانى بۇرعىلاۋ جوسپارلانىپ وتىر. ونىڭ ۇشەۋى بۇرعىلاندى.

قىتايدىڭ CNOOC كومپانياسى العاش رەت ەلىمىزدەگى گەولوگيالىق بارلاۋ ىسىنە قارجى قۇيۋعا شەشىم قابىلدادى.

سونداي-اق Sinopec كومپانياسى قازاقستانعا قوماقتى ينۆەستيتسيا سالۋعا نيەتتى. Shell, Chevron, British Petroleum ترانسۇلتتىق كورپوراتسيالارى اتىراۋ, اقتوبە جانە ماڭعىستاۋ وڭىرلەرىندەگى ۋچاسكەلەردى جان-جاقتى زەرتتەۋدە.

پرەزيدەنتكە سوڭعى 7 ايدا مۇناي مەن كوندەنسات ءوندىرىسىنىڭ كولەمى 15,3 ميلليون توننانى قۇراعانى تۋرالى باياندالدى. بۇل 2024 جىلدىڭ وسى كەزەڭىمەن سالىستىرعاندا 9 پايىزعا جوعارى. ال تابيعي جانە ىلەسپە گازدى ءوندىرۋ كولەمى 6,7 ميلليارد تەكشە مەترگە جەتتى, ياعني بىلتىرعى جىلدىڭ كورسەتكىشىنەن 19 پايىزعا ارتىق. باتىس پرورۆا (اتىراۋ وبلىسى), ورىكتاۋ (اقتوبە وبلىسى), روجكوۆ (باتىس قازاقستان وبلىسى) كەن ورىندارىندا گاز وڭدەۋ كولەمىن ۇلعايتۋ جوبالارى جۇزەگە اسىرىلىپ جاتىر.

مەملەكەت باسشىسىنا مۇناي تاسىمالداۋ كولەمى 49 ميلليون توننانى قۇراعانى تۋرالى مالىمەت بەرىلدى. قوسىمشا تاسىمالداۋ باعىتتارىن دامىتۋ جۇمىستارى قولعا الىندى: جەتى ايدا ازەربايجان باعىتىنا 0,9 ميلليون توننا, گەرمانياعا 1,1 ميلليون توننا مۇناي تاسىمالداندى. ماجارستانعا 85 مىڭ توننا كولەمىندە قازاقستان مۇنايىنىڭ العاشقى پارتياسى جەتكىزىلدى.

بيىل وتاندىق مۇناي وڭدەۋ زاۋىتتارىندا 10,4 ميلليون توننا مۇناي وڭدەلدى. سونىڭ ىشىندە جانار-جاعارماي ءوندىرىسى 7,8 ميلليون تونناعا جەتىپ, 936 مىڭ تونناعا ۇلعايدى. بۇل – رەكوردتىق كورسەتكىش.

اسحات حاسەنوۆ ماڭعىستاۋ وبلىسىنداعى كەندىرلى زاۋىتىندا تۇشىتىلعان تەڭىز سۋى جاڭاوزەن قالاسىنىڭ سۋ تاراتۋ جەلىسىنە جىبەرىلە باستاعانىن ايتتى. بۇدان بولەك, قۋاتى 247 مۆت بولاتىن گيبريدتى ەلەكتر ستانساسىنىڭ قۇرىلىسى ءجۇرىپ جاتىر. جىلىنا 1 ملن 250 مىڭ توننا ءونىم شىعاراتىن پوليەتيلەن زاۋىتى بوي كوتەرۋدە. جوبا قۇنى – 7,4 ميلليارد دوللار.

سونىمەن قاتار پرەزيدەنتكە وڭىرلەردە جۇزەگە اسىرىلىپ جاتقان الەۋمەتتىك جوبالار تانىستىرىلدى.

كەزدەسۋ سوڭىندا مەملەكەت باسشىسى گەولوگيالىق بارلاۋ جانە ءىرى ينۆەستيتسيالىق باستامالاردى ىسكە اسىرۋ بويىنشا جۇيەلى جۇمىستى جالعاستىرۋدى تاپسىردى.