مەملەكەت باسشىسىنىڭ كاسپي تەڭىزى پروبلەماسىن كەشەندى زەرتتەۋ جونىندەگى تاپسىرماسىن جۇزەگە اسىرۋ شەڭبەرىندە «قازاق كاسپي تەڭىزى عىلىمي-زەرتتەۋ ينستيتۋتى» كەاق-قا ۇكىمەت رەزەرۆىنەن 305 ملن تەڭگە ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى.
ينستيتۋت پرەزيدەنت تاپسىرماسىمەن كاسپي تەڭىزىنىڭ ەكولوگيالىق ماسەلەسىن زەرتتەۋ ماقساتىندا قۇرىلدى. اتاپ ايتقاندا, عزي-ءدىڭ قىزمەت اياسىنا بالىق قورىنىڭ كولەمىن باعالاۋ, ولاردى ساقتاۋ ادىستەرى مەن تەحنولوگياسىن ازىرلەۋ, يحتيوفاۋنانى زەرتتەۋ, يتبالىقتىڭ جاپپاي قىرىلۋ سەبەبىن انىقتاۋ مەن ونىڭ پوپۋلياتسياسىن ساقتاۋ ماسەلەسى كىرەدى. سونىمەن قاتار تەڭىزدىڭ گيدرولوگيالىق ۇدەرىستەرىن زەرتتەۋگە جانە ونىڭ دەڭگەيىن باقىلاۋعا, كليماتتىڭ وزگەرۋى مەن ونىڭ ەكوجۇيەگە اسەرىن تالداۋعا, سۋدىڭ ساپاسى, بيولوگيالىق الۋانتۇرلىلىك پەن كاسپي تەڭىزىنىڭ قازاقستاندىق بولىگى مەن جاعالاۋىنىڭ وزگە دە پارامەترلەرى جونىندەگى دەرەكتەردى جيناۋ ءارى تالداۋمەن اينالىسادى.
ۇكىمەت رەزەرۆىنەن بولىنگەن قاراجات ينستيتۋتتى ودان ءارى دامىتۋعا باعىتتالعان. گيدروبيولوگيا مەن گيدروحيميا, گيدرومەتەورولوگيا, سپۋتنيكتىك مونيتورينگ زەرتحانالارىندا عىلىمي-زەرتتەۋ جۇمىسىن ۋاقتىلى ءارى ءتيىمدى جۇرگىزۋگە, سونداي-اق ينستيتۋتقا جۇكتەلگەن وزگە دە مىندەتتەردى ورىنداۋعا مۇمكىندىك بەرەدى.