بۇگىن ۇكىمەت وتىرىسىندا ەنەرگەتيكا ءمينيسترى ەرلان اقكەنجەنوۆ كومىر سالاسىنىڭ قازىرگى جاعدايى مەن دامۋ جوسپارلارى تۋرالى باياندادى, دەپ جازادى Egemen.kz.
مينيستر ەلىمىزىڭ كومىر ونەركاسىبى ەلدىڭ ەنەرگەتيكالىق قاۋىپسىزدىگى ءۇشىن ماڭىزدى ەكەنىن اتاپ ءوتتى. قازاقستان كومىر كەنىنىڭ قوماقتى قورىنا يە جانە الەمدە 10-شى ورىندا تۇر, بۇل ءوندىرۋدىڭ قازىرگى كولەمىمەن العاندا 300 جىلدان استام ۋاقىتقا جەتەدى.
ء«ىرى كومىر كەن ورىندارى ورتالىق قازاقستاننىڭ ەكى نەگىزگى ايماعىندا ورنالاسقان. ولار – قاراعاندى كومىر باسسەينى مەن تورعاي كومىر باسسەينىندەگى شۇباركول جانە جالىن كەن ورىندارى. سولتۇستىك-شىعىس ايماقتا ەكىباستۇز كومىر باسسەينى, مايكۇبى كومىر باسسەينى, قاراجىرا كەن ورنى بار. ەلىمىزدەگى كومىر قورىنىڭ كولەمى – 33,6 ملرد توننا», دەدى ەرلان اقكەنجەنوۆ.
ەلىمىز كومىر وندىرۋدەن ون ءىرى ەلدىڭ قاتارىنا كىرەدى
ەرلان اقكەنجەنوۆ قازىر كومىر سالاسىنا جاڭا ينۆەستيتسيالار تارتۋ بويىنشا جۇيەلى جۇمىس جۇرگىزىلىپ جاتقانىن دا جەتكىزدى. جۇمىس باعدارلامالارىنا سايكەس 2025 جىلى كومىر ونەركاسىبىندەگى كەلىسىمشارتتارعا سالىنعان ينۆەستيتسيالار كولەمى 305 ملرد تەڭگەنى قۇرادى, ال 2026 جىلى سالاعا تارتىلعان ينۆەستيتسيا شامامەن 553,5 ملرد تەڭگە بولادى دەپ بولجانىپ وتىر. سونداي-اق كومىر ونەركاسىبىندە 32 مىڭعا جۋىق ادام جۇمىسپەن قامتىلعان. سەكتوردىڭ تۇراقتى دامۋى بارىسىندا جۇمىس ورىندارىنىڭ سانى وسە تۇسپەك.
«مينيسترلىك كومىر سالاسىنداعى گەولوگيالىق بارلاۋدى دامىتۋعا ەرەكشە نازار اۋدارىپ وتىر. بيىل جىل سوڭىنا دەيىن شامامەن 10 ۋچاسكە بويىنشا كومىر كەن ورىندارىنا جەر قويناۋىن پايدالانۋ قۇقىعىن بەرۋ تۋرالى اۋكتسيون وتكىزۋ جوسپارلانىپ وتىر», دەدى ەرلان اقكەنجەنوۆ.
پايدالى قازبالاردىڭ 103 ءتۇرى مەن 10 مىڭعا جۋىق كەن ورنى مەملەكەتتىك ەسەپكە الىنعان