قور كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنىڭ پاۆلودار مەن شىعىس قازاقستان وبلىستارىنداعى بالالار ۇيلەرىنىڭ 100 تاربيەلەنۋشىسىن كاسىبي باعدارلاۋعا ارنالعان «Samruk Umiti» جوباسى ءوز ناتيجەسىن بەرىپ وتىر.
«جەتىم كورسەڭ – جەبەي ءجۇر» دەيدى دانا حالقىمىز. بۇل – اتا-بابامىزدان جەتكەن وسيەت, ۇرپاق بويىنا مەيىرىم مەن قامقورلىق ءدانىن سەبەتىن اسىل ءسوز. ءدال وسى قاعيدانى «Samruk-Kazyna Trust» قورى جۇمىسشى ماماندىقتار جىلىندا «Samruk Umiti» جوباسى ارقىلى جۇزەگە اسىردى. باستامانىڭ العاشقى ناتيجەلەرى پاۆلوداردا وتكەن رەسپۋبليكالىق جاستار فورۋمىندا تانىستىرىلدى. وندا جوبا قاتىسۋشىلارى پرەمەر-ءمينيستردىڭ ورىنباسارى ەرمەك كوشەرباەۆپەن كەزدەستى.
فورۋمدا قوردىڭ بىرىڭعاي قايىرىمدىلىق وپەراتورى «Samruk-Kazyna Trust» قورىنىڭ باس ديرەكتورى الفيا اديەۆانىڭ ايتۋىنشا, 9-سىنىپتى ءبىتىرىپ, كوللەدجگە ءتۇسۋدى جوسپارلاپ وتىرعان 40 تاربيەلەنۋشىنىڭ 30-ى سۇرانىسقا يە تەحنيكالىق جانە جۇمىسشى ماماندىقتاردى تاڭداعان.
«جوبا باستاعان كەزدە 9-سىنىپ وقۋشىلارىنىڭ اراسىنان تەحنيكالىق ماماندىقتارعا قىزىعۋشىلىق تانىتقان نەبارى 11 ءجاسوسپىرىم بولدى. بۇگىندە ءتۇرلى كاسىبي باعدارلاۋ شارالارىنىڭ جانە مەنتورلاردىڭ كومەگىمەن بۇگىندە ەڭبەك ماماندىقتارىن تاڭداعان جاستاردىڭ سانى 30-عا جەتىپ وتىر. بۇل – جۇيەلى كاسىبي باعدار بەرۋ جاستاردىڭ وي-ساناسىن وزگەرتىپ, بولاشاققا دەگەن سەنىم بەرەتىنىن كورسەتەتىن ناقتى ناتيجە», دەدى الفيا اديەۆا.
پاۆلودار مەن شىعىس قازاقستان وبلىستارىنداعى بالالار ۇيلەرىنەن ىرىكتەلگەن 100 ءجاسوسپىرىم كەشەندى باعدارلاما اياسىندا كاسىپتىك باعدارلاۋ تەستىلەۋىنەن ءوتتى, مۇددەلەر كارتاسىن جاسادى, ەڭبەك نارىعى مەن ناقتى بوس جۇمىس ورىندارىمەن تانىستى. سونداي-اق قارجىلىق جانە قۇقىقتىق ساۋاتتىلىق, تۇلعالىق دامۋ باعىتىندا داعدىلار قالىپتاستىردى. ارقايسىسىنا جەكە تالىمگەر مەن كۋراتور بەكىتىلىپ, سەنىمدى بايلانىس ورناتىلدى.
جاستار تەوريانى تاجىريبەمەن ۇشتاستىرىپ, جەتەكشى ونەركاسىپتىك كاسىپورىندار مەن كوللەدجدەرگە بارىپ, جۇمىس ورنىن كوزبەن كورىپ, ماماندارمەن تىلدەستى. وقۋدى اياقتاعان بارلىق بالا «سامۇرىق-قازىنا» قورىنىڭ كومپانيالار توبىنا جۇمىسقا ورنالاسۋ مۇمكىندىگىنە يە بولادى.
جوبا اياسىندا كاسىبي باعدارى عانا ەمەس, ومىرلىك كوزقاراسى وزگەرگەن جاستىڭ ءبىرى – شاميل مەحنوۆتسەۆ. پاۆلودارداعى بالالاردى قولداۋ وڭىرلىك ورتالىعىنىڭ تاربيەلەنۋشىسى تەحنيك-مەحانيك ماماندىعىنا كوللەدجگە تۇسۋگە بەل بۋىپ وتىر.
«نەگىزى تەحنيكالىق ماماندىقتارعا جاقىنمىن. كاسىپورىندارعا بارعاندا ماماندارمەن كەزدەسىپ, كاسىپتىڭ قىر-سىرىمەن تانىسۋعا تىرىستىم. باستىسى وسى باعىتتى سانالى تۇردە تاڭدادىم. وزىمە ۇنايدى. جاقسى مامان اتانعىم كەلەدى», دەيدى بولاشاق ستۋدەنت.
ال وسكەمەندىك ليۋدميلا تەحنولوگ ماماندىعىن يگەرىپ, شەبەر اتانعىسى كەلەدى.
«العاشىندا شاشتاراز بولعىم كەلگەن. بىراق كوپ ويلانىپ, ءۇش ءتۇرلى ماماندىقتىڭ اراسىنان تاڭداۋ جاساۋ قيىن بولدى. سوڭىندا جۇرەگىمە جاقىن تەحنولوگ ماماندىعىن تاڭدادىم. «سامۇرىق-قازىنا» وزىمە ۇنايتىن ماماندىقتى تاڭداۋعا كومەكتەستى. كوللەدج وكىلدەرى مەكتەپكە كەلىپ, ماماندىقتار تۋرالى ايتىپ, ەكسكۋرسيا ۇيىمداستىردى. بۇل جوبا بىزگە تۇراقتى بولاشاق قۇرۋعا مۇمكىندىك بەرىپ وتىر», دەيدى ول.
الداعى جاڭا وقۋ جىلىندا قور باستاماشىلارى كوللەدجدەرمەن, كاسىپورىندارمەن كەلىسىم جاساپ, ءاربىر بالا تولىق قامقورلىققا الىنادى. سونىمەن قاتار «سامۇرىق-قازىنا» وڭىرلىك جاستار كەڭەستەرىنىڭ مۇشەلەرى بالالارعا تالىمگەر اتانىپ, كاسىبي شەبەرلىكتى شىڭداۋعا جاردەمدەسەدى.
ۇلى اباي «ەلدى ەل, ادامدى ادام ەتەتىن تەك ەڭبەك» دەگەن. «Samruk Umiti» ءدال وسى قاعيدانى باسشىلىققا الىپ, جاستاردى ەڭبەكسۇيگىشتىككە, كاسىبي دامۋعا, ءوز بولاشاعىن ءوز قولىمەن قۇرۋعا جەتەلەيدى.
مەرۋەرت شۋكۋەۆا