مەملەكەت باسشىسى اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا: «شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەگەن ەدى. پرەزيدەنت تاپسىرماسىنا سايكەس, بيىل العاش رەت 23 ءساۋىر – ۇلتتىق كىتاپ كۇنى بولىپ اتالىپ ءوتتى. وسى مەرەكەدە قازاق ادەبيەتىن كەڭىنەن ناسيحاتتاۋدى كوزدەيتىن جاڭا جوبا – «100 كىتاپ» ساۋالناماسى باستالىپ, ول اباي كۇنى قارساڭىندا قورىتىندىلاندى.
جالپىحالىقتىق ساۋالناما ەGov.kz پورتالىندا 23 ساۋىردەن 9 تامىزعا دەيىن جۇرگىزىلدى. ساۋالناماعا بارلىق وڭىردەن جالپى سانى 100 مىڭنان استام ادام داۋىس بەرگەن.
القالى جيىنعا قوعام قايراتكەرلەرى مەن زيالى قاۋىم وكىلى قاتىستى. جينالعاندار بۇل باستامانىڭ ەل رۋحانياتى ءۇشىن ايرىقشا ماڭىزدى قادام بولعانىن اتاپ ءوتتى.
قازاقستاننىڭ حالىق جازۋشىسى تولەن ابدىك تىڭ باستامانىڭ قازىرگى قوعامنىڭ ادەبي تالعامىن كورسەتەتىنىن ايتتى.
«بۇل 100 كىتاپ – حالىقتىڭ سۇرانىسى. ارينە, ءتىزىمدى قاراساق, كەي كىتاپتارعا قاراپ تاڭعالۋىمىز مۇمكىن. بىراق بۇگىنگى وقىرماننىڭ سۇرانىسىن ەسكەرمەۋگە تاعى بولمايدى. بۇل – ءالى جالعاسىن تاباتىن جوبا. قازاق ادەبيەتىنىڭ قورجىنى 100 كىتاپپەن تولمايدى. مۇنداي ىزگى جوبالاردى حالىققا كەڭىنەن تانىستىرۋ كەرەك», دەدى جازۋشى.
ال جازۋشىلار وداعىنىڭ توراعاسى, ۇلتتىق قۇرىلتاي مۇشەسى مەرەكە قۇلكەنوۆ: «ادەبي ساۋالناما باستالعان كەزدە حالىق قالاي داۋىس بەرەر ەكەن دەپ كۇماندانىپ قالعانىم راس. بىراق ناتيجەسىندە, 100 مىڭنان اسا وقىرمان داۋىس بەرىپتى. بۇل – ايتارلىقتاي كورسەتكىش. الەمدە دە مۇنداي تاجىريبەلەر ءجيى جاسالىپ تۇرادى», دەيدى.
جيىنعا قاتىسقانداردىڭ پىكىرى بويىنشا, بۇل جوبا قازاق ادەبيەتىن ناسيحاتتاۋعا ىقپال ەتىپ قانا قويماي, كىتاپ وندىرىسىنە دە, كىتاپحانا ىسىنە دە سونى سەرپىن بەرەدى.
قورىتىندى تىزىمگە كلاسسيكالىق شىعارمالاردان باستاپ, قازىرگى زامان اۆتورلارىنىڭ دا تۋىندىلارى ەندى.
تولىق ءتىزىم ۇلتتىق قۇرىلتايدىڭ رەسمي سايتىندا جاريالاندى. بۇل جوبا ەندى تۇراقتى تۇردە جالعاسىپ, ءتىزىم جاڭارتىلىپ وتىرادى.