د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە 2025-2026 وقۋ جىلىنان باستاپ «اتوم ەلەكتر ستانتسياسىن پايدالانۋ» اتتى جاڭا ءبىلىم بەرۋ باعدارلاماسى ىسكە قوسىلادى. بۇل باعدارلاما حالىقارالىق اتوم ەنەرگياسى اگەنتتىگىنىڭ (ماگاتە) ساراپشىلارىنىڭ قاتىسۋىمەن ازىرلەنىپ, ەلىمىزدەگى العاشقى اتوم ەلەكتر ستانتسياسىنا قاجەتتى جوعارى بىلىكتى مامانداردى دايارلاۋعا باعىتتالعان, دەپ حابارلايدى Egemen.kz.
باعدارلاما «اەس قۇرىلىسى باعدارلاماسىن قولداۋ ءۇشىن ءبىلىم بەرۋ مەن كادرلاردى دايارلاۋ سالاسىنداعى ۇلتتىق الەۋەتتى نىعايتۋ جونىندەگى ساراپشىلار ميسسياسى» جانە «KAZ2010: اتوم ەنەرگەتيكاسى باعدارلاماسىن ەنگىزۋ ءۇشىن ينفراقۇرىلىمدى دامىتۋعا قولداۋ (3-كەزەڭ)» جوبالارى اياسىندا جاساقتالدى.
ماگاتە ساراپشىلارىنىڭ ۇسىنىستارىنا سايكەس دايىندالعان وقۋ جوسپارى يادرولىق ەنەرگەتيكا سالاسىنىڭ نەگىزگى اسپەكتىلەرىن قامتيدى. وقىتىلاتىن پاندەر قاتارىندا اتوم ستانتسيالارىنىڭ جابدىقتارى, يادرولىق رەاكتورلار فيزيكاسى, رادياتسيالىق قاۋىپسىزدىك, يادرولىق وتىن تسيكلى, جابدىقتى جاڭعىرتۋ مەن مونتاجداۋ سياقتى ماڭىزدى باعىتتار بار. سونىمەن قاتار, ستۋدەنتتەر تەوريالىق بىلىممەن قاتار كۋرچاتوۆ قالاسىنداعى ۇلتتىق يادرولىق ورتالىقتا جانە وسكەمەندەگى مەتاللۋرگيالىق زاۋىتتا تاجىريبەدەن وتەدى.
2025 جىلعى ساۋىردە ۋنيۆەرسيتەت قابىرعاسىندا ماگاتە مەن رەسەيدەگى ۇلتتىق زەرتتەۋ يادرولىق ۋنيۆەرسيتەتى ميفي وكىلدەرىنىڭ قاتىسۋىمەن حالىقارالىق فورۋم ءوتىپ, وندا اتوم سالاسىنداعى ءبىلىم بەرۋ مەن كادرلىق الەۋەتتى دامىتۋ ماسەلەلەرى تالقىلاندى. باعدارلامانىڭ اكادەميالىق كوميتەتىنە ۋنيۆەرسيتەتتىڭ جەتەكشى وقىتۋشىلارى مەن ءوندىرىس وكىلدەرى كىردى, ولاردىڭ قاتارىندا ء«ۇمز» اق عىلىمي ورتالىعىنىڭ باستىعى ماناربەك قىلىشقانوۆ بار. سونىمەن قاتار, 2025 جىلدىڭ ماۋسىمىندا باعدارلاما وقىتۋشىلارى ايجان ءبايدىلدينا مەن نادەجدا پروحورەنكوۆا ۆەنگرياداعى اتوم ەلەكتر ستانتسياسىندا تاعىلىمدامادان ءوتتى. ال قازان ايىندا مەكتەپ دەكانى ايبەك اقاەۆ ۆەنادا وتەتىن ماگاتە-ءنىڭ StarNet جەلىسى وتىرىسىنا قاتىسادى.
باعدارلاما حالىقارالىق يادرولىق قاۋىپسىزدىك تالاپتارىنا تولىق ساي كەلەدى. بۇل ءوز كەزەگىندە قازاقستاننىڭ اتوم ەنەرگەتيكاسى سالاسىنداعى كادرلىق رەزەرۆىن قالىپتاستىرىپ قانا قويماي, ەلدىڭ ەنەرگەتيكالىق قاۋىپسىزدىگىن نىعايتىپ, تەحنولوگيالىق تاۋەكەلدەردى ازايتۋعا ىقپال ەتەدى. باعدارلاما العاشقى ىسكە قوسىلعان جىلى-اق حالىقارالىق ستاندارتتارعا ساي العاشقى اككرەديتتەۋدەن وتۋگە دايىندالىپ جاتىر.