بۇگىن ۇلى قازاق اقىنى, ويشىلى جانە اعارتۋشىسى اباي قۇنانباي ۇلىنىڭ تۋعانىنا 180 جىل تولۋىنا وراي ورال قالاسىندا ونىڭ ەسكەرتكىشىنە گۇل قويۋ ءراسىمى ءوتتى.
باتىس قازاقستان وبلىسىنىڭ اكىمى ناريمان تورەعاليەۆ, باسقارما باسشىلارى, شىعارماشىلىق زيالى قاۋىم وكىلدەرى, ستۋدەنتتەر مەن وقۋشىلار قازاق حالقىنىڭ ۇلى پەرزەنتىنە تاعزىم ەتتى.
سالتاناتتى شارادا ناريمان تورەعاليەۆ ابايدىڭ رۋحاني مۇراسىنىڭ قازىرگى جانە بولاشاق ۇرپاق ءۇشىن باعا جەتپەس باعدار ەكەنىن اتاپ ءوتتى:
«اباي قۇنانباي ۇلى – دانالىقتىڭ, ادامگەرشىلىكتىڭ جانە بىلىمگە ۇمتىلۋدىڭ سيمۆولى. ونىڭ ءسوزى مەن يدەيالارى بۇگىن دە وزەكتى, ءبىزدى ورلەۋگە, ۇلتتىق رۋحتى نىعايتۋعا جانە مادەني قۇندىلىقتاردى ساقتاۋعا شابىتتاندىرادى», — دەدى ن. تورەعاليەۆ.
سونىمەن قاتار, سالتاناتتى جيىندا ايماق باسشىسى جۋىردا سەمەي قالاسىندا وتكەن مارافوندا توپ جارعان ورالدىق سپورتشىنىڭ جەڭىسىن دە اتاپ ءوتتى. ناريمان تورەعاليەۆتىڭ ايتۋىنشا بۇل جەتىستىك – ءوڭىر جاستارىنىڭ تاباندىلىعى مەن جەڭىسكە دەگەن جىگەرىنىڭ ايقىن كورىنىسى, ۇلى ويشىلدىڭ كۇللى دالامىزعا ورتاق ەكەنىنىڭ ايعاعى.
ءىس-شارا بارىسىندا قاتىسۋشىلار ۇلى ويشىلدى ءبىر مينۋت ۇنسىزدىكپەن ەسكە الىپ, ەسكەرتكىشىنە گۇل شوقتارىن قويدى.
ءوڭىردىڭ شىعارماشىل جاستارى ابايدىڭ ولەڭدەرىن وقىپ, وبلىستىق فيلارمونيا ارتىستەرى ونىڭ بەلگىلى مۋزىكالىق شىعارمالارىن ورىندادى.