كوكشەتاۋ جاعالاۋى بۇگىن ساز, پوەزيا, ونەر مەن قولونەر توعىسقان ەرەكشە مەرەكەلىك الاڭعا اينالدى. اقمولا وبلىسىندا ۇلى اقىن, ويشىل جانە اعارتۋشى اباي قۇنانباي ۇلىنىڭ 180 جىلدىعى اتالىپ وتۋدە, دەپ حابارلايدى Egemen.kz.
ۇلى ويشىلدىڭ مەرەيتويىنا ارنالعان مەرەكەلىك كەڭىستىك مۋزىكالىق, ادەبي, تەاتر, بەينەلەۋ ونەرى جانە قولونەر الاڭدارىن بىرىكتىرىپ, قالانىڭ ورتالىعىن قازاق مادەنيەتىنىڭ ءتىرى ەنتسيكلوپەدياسىنا اينالدىردى.
تاڭەرتەڭنەن باستاپ اربات بويىنداعى الاڭداردا ءتۇرلى ءىس-شارالار ءوتتى. كەلۋشىلەر پوەزيادان باستاپ, ۆوكالدىق بايقاۋدىڭ سوڭعى اككوردىنا دەيىنگى مادەني باعدارلامانى تاماشالادى.
– پرەزيدەنت قاسىم-جومارت كەمەل ۇلى توقاەۆتىڭ باستاماسىمەن اباي مۇراسىن ناسيحاتتاۋ مەملەكەتتىك دەڭگەيگە كوتەرىلدى. بۇل – تەك اقىنعا عانا ەمەس, بۇكىل حالقىمىزعا كورسەتىلگەن قۇرمەت. جىل بويى وبلىستا كوپتەگەن ءىس-شارالار, عىلىمي كونفەرەنتسيالار, ادەبي بايقاۋلار مەن كورمەلەر ۇيىمداستىرىلدى. بۇل – جاس ۇرپاقتى رۋحاني بايلىققا جەتەلەيتىن ىزگى قادامدار, – دەدى اقمولا وبلىسى اكىمىنىڭ ورىنباسارى دوسۇلان ايتباەۆ.
پوەزيالىق «ولەڭ ءسوزدىڭ پاتشاسى» بايقاۋىندا رەسپۋبليكالىق جارىستاردىڭ جەڭىمپازدارى اباي فيلوسوفياسى مەن شىعارماشىلىعىنا ارنالعان اۆتورلىق تۋىندىلارىن وقىدى. جىرلار بىردە تەرەڭ تەبىرەنىسپەن, بىردە ادەبي باسەكەنىڭ قىزۋىمەن ورىندالىپ, كورەرمەندەردى باۋرادى.
جاس سۋرەتشىلەردىڭ «جىل مەزگىلدەرى» بايقاۋى اياسىنداعى كورمەدە كوكشەتاۋ, قوسشى, ستەپنوگورسك جانە وبلىس اۋداندارىنداعى ارت-ستۋديالاردىڭ جۇمىستارى ۇسىنىلدى. تۋىندىلاردا ۇلى اقىن ويلارىنان شابىت العان بەينەلەر مەن مەتافورالار ارقىلى جىل مەزگىلدەرى كورىنىس تاپقان.
«اباي الەمى» كىتاپ جارمەڭكەسىندە سيرەك باسىلىمدار, شىعارمالاردىڭ ءتۇرلى تىلدەردەگى اۋدارمالارى جانە مۇراعاتتىق ماتەريالدار قويىلدى. سونداي-اق «شەبەرلەر شاھارى» قولدانبالى ونەر الاڭىندا كيىز, بىلعارى, تاس جانە مەتالدان جاسالعان قازاقى ءداستۇرلى بۇيىمدار دايىندالدى.
فولكلورلىق انسامبلدەر فەستيۆالىندە «اباي دانا, اباي دارا» تاقىرىبىندا اتباسار, ەرەيمەنتاۋ, قورعالجىن, جارقايىڭ جانە وزگە دە اۋدانداردىڭ ۇجىمدارى دومبىرامەن حالىق اندەرىن ورىندادى.
وبلىستىق امبەباپ عىلىمي كىتاپحانادا ء«اندى سۇيسەڭ, مەنشە ءسۇي» ۆوكالدىق بايقاۋى وتسە, وبلىستىق حالىق شىعارماشىلىعى ورتالىعىندا «دانالىق باستاۋى – اباي» تەاتر فەستيۆالى اياسىندا اقىن مەن ءبىرجان سالدىڭ كەزدەسۋىن بەينەلەيتىن قويىلىمدار ساحنالاندى.
كۇننىڭ ەكىنشى جارتىسىندا وتكەن «اباي الەمى» كونتسەرتىنە قازاقستاننىڭ ەڭبەك سىڭىرگەن مادەنيەت قايراتكەرلەرى قاتىستى. مۋزىكا, پوەزيا, بەينەلەۋ ونەرى مەن تەاتر توعىسقان بۇل مەرەكەدە ابايدىڭ رۋحى بۇگىنگى كۇنمەن ۇندەسىپ, ادامداردى ماڭگىلىك قۇندىلىقتار توڭىرەگىندە بىرىكتىردى.
كەشكىسىن ادەبي-مۋزىكالىق مەرەكە تەاترلاندىرىلعان باعدارلاما, مۋزىكالىق نومىرلەر مەن شىعارماشىلىق قويىلىمدارمەن جالعاسادى.