پرەزيدەنتتىڭ ءباسپاسوز حاتشىسى رۋسلان جەلدىباي باق-تىڭ سۇراۋىنا وراي قاسىم-جومارت توقاەۆ پەن ۆلاديمير ءپۋتيننىڭ تەلەفون ارقىلى سويلەسۋىنە قاتىستى پىكىر ءبىلدىردى.
مەملەكەت باسشىسى قاسىم-جومارت توقاەۆ پەن پرەزيدەنت ۆلاديمير ءپۋتيننىڭ تەلەفون ارقىلى سويلەسۋىنە رەسەي تاراپى باستاماشى بولدى. اڭگىمە دوستىق ءارى ءوزارا سەنىم سيپاتىندا ءوربىدى.
تاراپتار ۋكراينا قاقتىعىسىن رەتتەۋگە ەرەكشە نازار اۋداردى. ۆلاديمير پۋتين اقش پرەزيدەنتى دونالد ترامپتىڭ ارناۋلى وكىلىمەن كەلىسسوزدەر ناتيجەسى تۋرالى ەگجەي-تەگجەيلى مالىمەت بەردى.
قاسىم-جومارت توقاەۆ الدىن الا قول جەتكىزىلگەن ۋاعدالاستىقتاردى قۇپتاپ, قازاقستان اۋەل باستان اسكەري قيمىلداردى توقتاتۋدى كوزدەيتىن بەيبىتشىلىك فورمۋلاسىن ىزدەۋدى جاقتاعانىن اتاپ ءوتتى.
سونىمەن قاتار مەملەكەتتەر باسشىلارى ەكىجاقتى كۇن ءتارتىبىن تالقىلادى.
قازاقستان پرەزيدەنتى بيىل قاراشا ايىنا جوسپارلانعان ماسكەۋگە مەملەكەتتىك ساپارىنا ايرىقشا ءمان بەرەتىنىن ايتتى. اتالعان ساپاردىڭ ماقساتى – ستراتەگيالىق سەرىكتەستىك پەن وداقتاستىق رۋحىنداعى ىنتىماقتاستىقتى جان-جاقتى كەڭەيتۋ.