جىل باسىنان بەرى «قازسۋشار» رمك باتىس قازاقستان فيليالى تابيعاتتى قورعاۋ ماقساتىندا سۋ جىبەرۋ جانە تابيعي شابىندىقتاردى سۋارۋ ءۇشىن 54 ملن تەكشە مەتردەن استام سۋ جىبەردى.
«قازسۋشار» رمك-دان الىنعان اقپاراتقا قاراعاندا, جانىبەك سۋارۋ-سۋلاندىرۋ جۇيەسى ارقىلى بۇگىنگە دەيىن 7,9 ملن تەكشە مەتر سۋ, ال ورال-كوشىم سۋارۋ-سۋلاندىرۋ جۇيەسى ارقىلى 22,25 ملن تەكشە مەتر سۋ جىبەرىلدى. سونىمەن قاتار فيليال ديقاندارمەن سۋارۋ سۋىن جەتكىزۋگە كەلىسىمشارت جاساۋدى جالعاستىرىپ جاتىر. بۇگىندە ورال-كوشىم سۋارۋ-سۋلاندىرۋ جۇيەسى ارقىلى 5 335,5 گەكتار جەرگە 20 ملن تەكشە مەتر سۋ جەتكىزۋگە 178 كەلىسىمشارت, شاعان وزەنىندەگى سۋ قويماسىنان 1 879,4 گەكتار جەرگە 6 ملن تەكشە مەتر سۋ اپارۋعا 72 كەلىسىمشارت جاسالدى.
«تابيعاتتى قورعاۋ ماقساتىندا سۋ جىبەرۋ مەن تابيعي شابىندىقتاردى سۋارۋ ەكولوگيالىق تەپە-تەڭدىكتى ساقتاۋعا مۇمكىندىك بەرىپ, وڭىردەگى فلورا مەن فاۋنانىڭ جاي-كۇيىن جاقسارتۋعا كومەكتەسەدى. سانيتارلىق-ەكولوگيالىق ماقساتتا بەرىلەتىن سۋ جەرگىلىكتى مال شارۋاشىلىعىن قاجەتتى ازىقپەن دە قامتاماسىز ەتەدى», دەدى بقو-داعى «قازسۋشار» رمك فيليالى ديرەكتورىنىڭ مىندەتىن اتقارۋشى راۋان حۋساينوۆ.