بيىل 180 جىلدىعى كەڭ كولەمدە اتالىپ ءوتىپ جاتقان ۇلى اقىن اباي مۇراسىن ۇلىقتاۋعا ۇلتتىق ۇلاننىڭ اسكەري بولىمدەرى دە بەلسەندى تۇردە اتسالىسۋدا, دەپ حابارلايدى Egemen.kz.
وسى ورايدا "اباي جولى – بولاشاققا باعدار" دەگەن ۇرانمەن «وڭتۇستىك» وڭىرلىك قولباسشىلىعىنا قاراستى اسكەري بولىمدەر اراسىندا ەرەكشە چەللەندج ۇيىمداستىرىلدى. يگى باستاما اياسىندا ساربازدار مەن وفيتسەرلەر اباي قۇنانباي ۇلىنىڭ ولەڭدەرى مەن قارا سوزدەرىن جاتقا وقىپ, ءبىر-بىرىنە ەستافەتا جولدادى.
ماسەلەن, شىمكەنت قالاسىنداعى 6506 اسكەري ءبولىمى العاشقى بولىپ چەللەندجدى باستاپ, الماتى قالاسىندا ورنالاسقان 5571 اسكەري بولىمىنە جولدادى. ءوز كەزەگىندە الماتىلىق ساربازدار ەستافەتانى تاراز قالاسىنداعى 5513 اسكەري بولىمىنە تاپسىردى. بۇل ءۇردىس وڭىرلىك بولىمدەر اراسىندا جالعاسىپ, اقىن شىعارماشىلىعىن كەڭىنەن ناسيحاتتاۋعا سەپ بولۋدا. كەلەسى كەزەكتە قىزىلوردالىق اسكەريلەر ەستافەتانى قابىلداپ, ءارى قاراي الماتى وبلىسىنداعى الاتاۋ قالاسىنا جولدادى. چەللەندجدى تالدىقورعانداعى ۇلتتىق ۇلاننىڭ اسكەري ءبولىمى جالعاستىرىپ, الماتى, شىمكەنت قالالارىنداعى باسقا اسكەري بولىمدەر دە ءۇن قوستى. اباي شىعارمالارىنا ارنالعان ونكۇندىك ەستافەتاسىن تۇركىستان قالاسىنداعى 5574 اسكەري ءبولىمى اياقتايدى.
چەللەندج بەينەروليكتەرى اسكەري بولىمدەردىڭ الەۋمەتتىك جەلىدەگى رەسمي پاراقشالارىندا جاريالانىپ, جۇرتشىلىقتىڭ وڭ باعاسىن الۋدا. يگى باستاما جاس بۋىننىڭ ادەبيەتكە دەگەن قىزىعۋشىلىعىن ارتتىرىپ, اباي مۇراسىن تەرەڭىرەك تانۋعا مۇمكىندىك بەرىپ وتىر.