جىل باستالعالى «قازسۋشار» رمك باتىس قازاقستان فيليالى تابيعاتتى قورعاۋ جانە شابىندىقتاردى سۋارۋ ءۇشىن 54 ملن تەكشە مەتردەن استام سۋ جىبەرگەن. جانىبەك سۋارۋ-سۋلاندىرۋ جۇيەسى ارقىلى بۇگىنگە دەيىن 7,9 جانە ورال-كوشىم ارقىلى 22,25 ملن تەكشە مەتر سۋ جىبەرىلگەن, دەپ جازادى Egemen.kz.
سونىمەن قاتار فيليال ديقاندارمەن سۋارۋ سۋىن جەتكىزۋگە كەلىسىمشارتتار جاساۋدى جالعاستىرىپ جاتىر. بۇگىندە ورال-كوشىم سۋارۋ-سۋلاندىرۋ جۇيەسى ارقىلى 5 335,5 گەكتار جەرگە 20 ملن تەكشە مەتر سۋ جەتكىزۋگە 178 كەلىسىمشارت, ال شاعان وزەنىندەگى سۋ قويماسىنان 1 879,4 گەكتار جەرگە 6 ملن تەكشە مەتر سۋ جەتكىزۋگە 72 كەلىسىمشارت جاسالعان.
بقو-داعى «قازسۋشار» رمك فيليالى ديرەكتورىنىڭ مىندەتىن اتقارۋشى راۋان حۋساينوۆتىڭ ايتۋىنشا تابيعاتتى قورعاۋ ماقساتىندا سۋ جىبەرۋ مەن تابيعي شابىندىقتاردى سۋارۋ ەكولوگيالىق تەپە-تەڭدىكتى ساقتاۋعا مۇمكىندىك بەرىپ, وڭىردەگى فلورا مەن فاۋنانىڭ جاي-كۇيىن جاقسارتۋعا كومەكتەسەدى.
«سانيتارلىق-ەكولوگيالىق ماقساتتا بەرىلەتىن سۋ جەرگىلىكتى مال شارۋاشىلىعىن قاجەتتى ازىقپەن دە قامتاماسىز ەتەدى», دەدى ر.حۋساينوۆ.