ۇلى اباي قۇنانباي ۇلىنىڭ 180 جىلدىق مەرەيتويى ىلە اۋدانىندا دا كەڭ كولەمدە اتالىپ كەلەدى. كۇنى كەشە بورالداي كەنتىندەگى №54 ورتا مەكتەپتىڭ كىتاپحاناسىندا اقىن شىعارماشىلىعىن ارقاۋ ەتكەن «اباي الەمى» اتتى ءىس-شارا ءوتتى. وندا ابايدىڭ, پۋشكيننىڭ پورترەتتەرى مەن دايەكتى سوزدەرى ءىلىنىپ, كىتاپ كورمەسى ۇيىمداستىرىلدى. مەكتەپتىڭ دارىندى وقۋشىلارى حاكىم شىعارماشىلىعىنا توقتالىپ, ونىڭ تاربيەلىك مازمۇنى تۋرالى بىلگەندەرىن ايتتى.
اباي ولەڭدەرىن وقۋ ارقىلى جاس وسكىننىڭ بىلىمگە قۇشتارلىعىن ارتتىرىپ, وقۋ قابىلەتتەرىن, سويلەۋ مانەرىن جەتىلدىرىپ, سوزدىك قورىن بايىتۋدى ماقسات ەتكەن پوەزيا ساباعى وقۋشىلاردىڭ سۇراق-جاۋابى مەن شىعارماشىلىق كورىنىستەرىنە ۇلاستى. اقىننىڭ بوزبالا شاعى تارتىمدى ءارى مازمۇندى بەينەلەنىپ, كورەرمەندەرىن تەبىرەنتتى. مەكتەپ كىتاپحاناسىنىڭ مەڭگەرۋشىسى بيبىگۇل دوسجانوۆا مەن اياۋلىم باكالوۆا ۇيىتقى بولعان ادەبي كەشكە قاتىسقان وقۋشىلار حاكىم ولەڭى مەن قاراسوزدەرىن وقۋدا العىرلىق تانىتۋمەن قاتار, بەينەباياندارىن تارتۋ ەتتى.
«اسىل ءسوزدى ىزدەسەڭ,
ابايدى وقى, ەرىنبە.
ادامدىقتى كوزدەسەڭ,
جاتتاپ, توقى كوڭىلگە»,
دەگەن سۇلتانماحمۇت تورايعىر ۇلىنىڭ ولەڭ جولدارىمەن تۇيىندەلدى.
« ۇلى اقىننىڭ ولەڭدەرىن وقۋ ارقىلى وسكەلەڭ ۇرپاقتىڭ بويىنا ادامگەرشىلىكتىڭ, ىزگىلىكتىڭ, مەيىرىم مەن قايىرىمنىڭ ءدانى ەگىلەدى. بۇگىنگى اقپاراتتىق تەحنولوگيالار اعىمىندا ءومىر ءسۇرىپ جاتقان جاستارعا اباي شىعارمالارىن ناسيحاتتاۋ ارقىلى ۇلتتىق ءتالىم-تاربيەنى ءسىڭىرىپ, تانىم كوكجيەگىن كەڭەيتۋدىڭ ماڭىزى زور. سوندىقتان دا مۇنداي مازمۇندى ءىس-شارالار اۋدان مەكتەپتەرىن تۇگەل قامتىپ, جاس بۋىننىڭ بەلسەنە اتسالىسۋىنا باسا نازار اۋدارىلۋدا», – دەيدى ىلە اۋداندىق ءبىلىم ءبولىمىنىڭ باسشىسى ارايلىم اقسۋبايقىزى.
الماتى وبلىسى