عىلىم جانە جوعارى ءبىلىم ءمينيسترى ساياسات نۇربەك 2025-2026 وقۋ جىلىنا ارنالعان مەملەكەتتىك ءبىلىم بەرۋ گرانتتارىنىڭ يەگەرلەرىن قۇتتىقتاپ, گرانت الا الماعان تالاپكەرلەرگە ارنالعان بالاما مۇمكىندىكتەردى اتادى, دەپ حابارلايدى Egemen.kz.
– بيىلعى ءبىلىم بايگەسىندە باق سىناپ, جاۋاپتى مەجەنى ەڭسەرگەندەرىڭىزگە قۋانىشتىمىن! 77 مىڭنان استام تالاپكەر گرانت يەگەرى اتاندى. بۇل – قاجىرلى ەڭبەك پەن بىلىمگە دەگەن تالپىنىستىڭ ناتيجەسى. ال گرانتقا ىلىگە الماعاندار ءۇشىن بۇل – ءۇمىتتىڭ ءۇزىلۋى ەمەس. گرانت – تەك ءبىر مۇمكىندىك. ال تاباندىلىق پەن ماقساتقا ادالدىق – جەتىستىككە باستار باستى كۇش, – دەدى مينيستر.
ونىڭ ايتۋىنشا, بيىلعى كونكۋرسقا وتكەن جىلمەن سالىستىرعاندا 9 مىڭ تالاپكەر ارتىق ءوتىنىش بەرگەن. وسىعان بايلانىستى باسەكەلەستىك تە جوعارى بولدى. دەگەنمەن, مەملەكەتتىك گرانتتان بولەك, باسقا دا قولجەتىمدى ءبىلىم بەرۋ مۇمكىندىكتەرى بار.
مينيستر اتاپ وتكەن بالاما مۇمكىندىكتەر:
ۋنيۆەرسيتەتىشىلىك رەكتور گرانتتارى. بۇل گرانتتار وقۋ ۇلگەرىمى جاقسى, بەلسەندى ءارى الەۋمەتتىك جاعدايى ەسكەرىلگەن تالاپكەرلەرگە جوعارى وقۋ ورىندارى تاراپىنان ۇسىنىلادى. ماسەلەن, «تۋران-استانا» ۋنيۆەرسيتەتى ۇبت-دا 100 بالدان جوعارى جيناعان «التىن بەلگى» يەگەرلەرىنە 4 جىلدىق رەكتورلىق گرانتتار بەرەدى. حالىقارالىق تۋريزم جانە مەيماندوستىق ۋنيۆەرسيتەتى 680 ماقساتتى گرانت بولگەن.
جەرگىلىكتى اكىمدىك گرانتتارى. الەۋمەتتىك وسال توپتارعا جانە سۇرانىسقا يە ماماندىقتارعا وقىتۋ ءۇشىن اكىمدىكتەر بولەتىن گرانتتار. 2025 جىلى جەرگىلىكتى اتقارۋشى ورگاندار 1 700-دەن استام گرانت ءبولدى.
جۇمىس بەرۋشىلەردىڭ ارنايى گرانتتارى. جوعارى وقۋ ورىندارى مەن جۇمىس بەرۋشىلەر اراسىنداعى كەلىسىم نەگىزىندە بولىنەدى جانە تۇلەكتەردى جۇمىسپەن قامتۋعا باعىتتالعان.
جەكە دەمەۋشىلەر مەن قورلاردىڭ گرانتتارى.
«قازاقستان حالقىنا» قورى – 500 گرانت; «KAZENERGY» قاۋىمداستىعى – سولتۇستىك كاسپي جانە قاراشىعاناق جوبالارى ەسەبىنەن گرانتتار; «قازاتومونەركاسىپ» ۇاك – اۋىلدىق جاستارعا ارنالعان «Murager» باعدارلاماسى ارقىلى گرانتتار ۇسىنادى.بوس گرانتتار مەن اۋىسۋ مۇمكىندىگى. كەيبىر تالاپكەرلەر گرانتتان باس تارتقان جاعدايدا, كەلەسى جوعارى بالل جيناعان ۇمىتكەرگە مۇمكىندىك بەرىلەدى.
سونداي-اق, اقىلى بولىمدە وقۋدى باستاپ, كەيىن جاقسى وقۋ ۇلگەرىمىمەن بوس گرانتقا اۋىسۋعا بولادى.
– ەڭ باستىسى – ماقساتتان تايماۋ, مۇمكىندىكتەردى زەرتتەپ, ارەكەت ەتۋ. ارمانىڭ – بولاشاعىڭ. سول بولاشاق جولىندا قولداۋ مەن مۇمكىندىك ءاردايىم تابىلادى, – دەدى ساياسات نۇربەك.