اتىراۋ قالالىق پروكۋراتۋراسى ۇلەسكەرلەردىڭ قارجىسىن تۇرعىن ءۇي قۇرىلىسىنا زاڭسىز تارتۋدى جارنامالاۋمەن اينالىسقان 10 كومپانيانى انىقتادى, دەپ حابارلايدى Egemen.kz.
پروكۋرورلىق قاداعالاۋ اكتىسى نەگىزىندە كىنالىلەر اكىمشىلىك قۇقىق بۇزۋشىلىق تۋرالى كودەكسىنىڭ 320-بابىنىڭ 1-بولىگىمەن (ۇلەستىك قاتىسۋ تۋرالى زاڭنامانى بۇزۋ) اكىمشىلىك جاۋاپقا تارتىلدى. ولارعا 10,6 ملن تەڭگە مولشەرىندە ايىپپۇل سالىندى.
«ۇلەسكەرلەردىڭ قۇقىقتارىن قورعاۋ پروكۋراتۋرا ورگانىنىڭ قىزمەتىندەگى باسىم باعىتتاردىڭ ءبىرى بولىپ قالا بەرەدى. وسىعان وراي قالا پروكۋراتۋراسى ازاماتتارعا ۇلەستىك قۇرىلىسقا قاراجات سالماس بۇرىن قۇرىلىس سالۋشىنىڭ ليتسەنزياسى, جەر تەلىمىنە قۇقىق بەلگىلەيتىن قۇجاتتارى مەن قۇرىلىسقا رۇقسات قۇجاتتارىن مۇقيات تەكسەرۋدى ۇسىنادى», دەپ حابارلادى پروكۋراتۋرادان.