مەملەكەت باسشىسىنىڭ تاپسىرماسىن جۇزەگە اسىرۋ اياسىندا ەلىمىزدە زاڭسىز شەتەلگە شىعارىلعان اكتيۆتەردى ەلگە قايتارۋ ارقىلى الەۋمەتتىك نىساندار سالۋ جۇمىسى جالعاسىپ جاتىر. ارناۋلى مەملەكەتتىك قوردان قىزىلوردا وبلىسىنداعى دەنساۋلىق ساقتاۋ سالاسىنداعى بىرقاتار جوباعا شامامەن 7 ملرد تەڭگە ءبولىندى.
بۇل قاراجات ارال, قازالى, شيەلى, جاڭاقورعان اۋداندارىنداعى ورتالىق اۋداندىق اۋرۋحانالار جانىنان جاڭا عيماراتتار سالۋعا باعىتتالعان. وندا ينسۋلت ورتالىقتارى, رەنتگەنحيرۋرگيا بولىمشەلەرى جانە باسقا دا بەيىندى بولىمدەر اشىلىپ, زاماناۋي مەديتسينالىق جابدىقتار: ماگنيتتىك-رەزونانستىق توموگرافيا, كومپيۋتەرلىك توموگرافيا, انگيوگرافيالىق قوندىرعىلار ورناتىلادى. جوبالار جۇزەگە اسقان سوڭ, اۋىلدىق جەرلەردەگى 300 مىڭنان استام تۇرعىن مامانداندىرىلعان مەديتسينالىق كومەككە قول جەتكىزەدى. نىسانداردى بيىل پايدالانۋعا بەرۋ جوسپارلانعان.
ال جامبىل وبلىسىنداعى اۋرۋحانالاردى رەكونسترۋكتسيالاۋعا ارناۋلى مەملەكەتتىك قوردان 2,4 ملرد تەڭگە ءبولىندى. اتاپ ايتقاندا, بۇل قارجىعا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جامبىل وبلىسىنىڭ مەركى مەن تالاس اۋداندارىنداعى اۋدانارالىق كوپبەيىندى ورتالىق اۋرۋحانالاردى رەكونسترۋكتسيالاۋ كوزدەلگەن. ماسەلەن, قايتارىلعان اكتيۆتەردىڭ ءبىر بولىگى تالاس اۋداندىق كوپسالالى ورتالىق اۋرۋحانانى رەكونسترۋكتسيالاۋعا باعىتتالماق. قاراستىرىلعان قاراجات كولەمى – 2,3 ملرد تەڭگە.
ال مەركى اۋداندىق كوپسالالى ورتالىق اۋرۋحانانىڭ قابىلداۋ بولىمشەسىن جوندەۋگە 144,9 ملن تەڭگە جۇمسالماق. قۇرىلىس جۇمىستارى سوڭعى ساتىدا. نىساندى پايدالانۋعا بەرۋ جىل سوڭىنا جوسپارلانعان. جالپى العاندا, بيىل ارناۋلى مەملەكەتتىك قوردان جامبىل وبلىسىندا ءتورت دەنساۋلىق ساقتاۋ نىسانىن ىسكە قوسۋعا 2,8 ملرد تەڭگە باعىتتالعان. بۇعان دەيىن قورداي, تالاس اۋداندارىندا ەكى دارىگەرلىك امبۋلاتوريانىڭ قۇرىلىسى سالىنعانى تۋرالى حابارلانعان بولاتىن. ولاردىڭ ارقايسىسى تاۋلىگىنە 45 كەلۋشىگە دەيىن قابىلداي الادى.