وسى جىلى ەل اۋماعىنداعى بارلىق بالاباقشا ۆاۋچەرلىق قارجىلاندىرۋ جۇيەسىمەن قامتىلادى. اتا-انالاردىڭ ىڭعايىنا ورايلاستىرىلعان جاڭا باستاما جىل بۇرىن تارازدا قاناتقاقتى جوبا رەتىندە ىسكە قوسىلعان بولاتىن. بالانى ۇيدە وتىرىپ-اق كەزەككە قويۋعا مۇمكىندىك بەرەتىن جوبا تارازدىقتاردىڭ كوڭىلىنەن شىققان سىڭايلى. ويتكەنى اتا-انا بالا ءۇشىن بولىنگەن قاراجاتتى جۇيە نەگىزىندە قاداعالاي الادى. بۇل – ولار ءۇشىن ءتيىمدى.
باستاپقىدا تاراز, شىمكەنت جانە تۇركىستاندا قاناتقاقتى جوبا رەتىندە ىسكە قوسىلادى دەپ جوسپارلانعان جۇيە تارازدا ساتىمەن جۇزەگە استى دەۋگە تولىق نەگىز بار. جۇيەنىڭ ارتىقشىلىعى – بالانى بالاباقشاعا تىركەۋ, جولداما الۋ مۇمكىندىگى.
اتا-انا ۆاۋچەرلىق قارجىلاندىرۋ جۇيەسىنە قوسىلۋ ارقىلى بالاباقشانى ءوز قالاۋىمەن تاڭداۋ مۇمكىندىگىنە يە بولادى. بۇل ءوز كەزەگىندە باسەكەلەستىكتى ارتتىرادى. ويتكەنى جۇمىس جۇيەسى كوڭىل كونشىتپەيتىن بالاباقشالار وزدىگىنەن جابىلادى.
«ىلگەرىدە ۇزىن-سونار كەزەككە تۇرۋدان قاجىپ جۇرەتىنبىز. ودان ابدەن زارەزاپ بولعان سوڭ, بالا دۇنيە ديدارىن كورگەننەن باستاپ كەزەككە جازىلا باستادىق قوي. ول جۇمىستىڭ ماشاقاتى كوپ ەدى. تىركەلۋ ءۇشىن ءتۇرلى مەكەمەنى جاعالاپ, تابان توزدىراتىنبىز. قازىر سول جۇيەنىڭ تۇپكىلىكتى جويىلىپ جاتقانى كوڭىل قۋانتادى.
راسىندا دا ۆاۋچەر جۇيەسى – اتا-انا ءۇشىن ءتيىمدى. بالانى تىركەۋ بىرەر مينۋت قانا ۋاقىتىڭدى الادى. ماسەلەن, تاڭعى ۋاقىتتا تىركەلسەڭ, كەشقۇرىم ۆاۋچەرلىق بەرىلەدى. ۋاقىتتان ۇتىلمايسىڭ», دەيدى جاڭا جوبانىڭ شاراپاتىن كورگەن اتا-انانىڭ ءبىرى ارايلىم وسپانوۆا.
راسىندا دا باستاپقىدا تارازدا باستاۋ العان جوبا جەرگىلىكتى حالىقتىڭ كوڭىلىنەن شىققان سەكىلدى. ويتكەنى ولار ءبىلىم ءبولىمى سەكىلدى مەكەمەلەرگە اعىلىپ, تابان توزدىرمايدى.
Indigo اقپاراتتىق جۇيەسى ارقىلى بالاباقشا تاڭداۋدى جۇزەگە اسىرادى. ولار تىزىمدە كورسەتىلگەن بالاباقشانىڭ ءبىرىن تاڭدايدى. شىنىندا دا, جاڭا جوبانىڭ جەرگىلىكتى حالىق ءۇشىن وتە ءتيىمدى ەكەنىنە ەشكىمنىڭ تالاسى جوق شىعار. ويتكەنى اتا-انالار ۆاۋچەر بولۋ ارقىلى جۇمىستىڭ ەدەاۋىر جەڭىلدەگەنىن العا تارتىپ وتىر.
جوعارىدا ايتقانىمىزداي, ۆاۋچەرلىك قارجىلاندىرۋ قاناتقاقتى جوبا رەتىندە وتكەن جىلى تارازدا جۇزەگە اسىرىلدى. دەرەككە سۇيەنسەك, مۇندا 25 مىڭ بالا بالاباقشا تابالدىرىعىن اتتاعان. بالدىرعانداردىڭ مەكتەپكە دەيىنگى بىلىممەن قامتاماسىز ەتىلۋىنە قازىنادان 18 ملرد تەڭگە قاراجات قاراستىرىلىپتى. اتا-انا بۇل قارجىنىڭ ماقساتتى جۇمسالۋىن دا قاداعالاي الادى ەكەن. تەك ۆاۋچەر رەتىندە تىركەلۋگە بەرىلەتىن ءۇش مۇمكىندىكتى ۋىستان شىعارىپ الماسا بولعانى.
«جاڭا جوبا ىسكە اسىرىلعالى بالاباقشالار اتا-انانىڭ تاڭداۋىنا تالاساتىنى بەلگىلى. بۇل ءوز كەزەگىندە جۇمىس ساپاسىن, ونىمدىلىگىن ارتتىرۋعا ايتارلىقتاي سەپ بولادى. باسەكە بار جەردە دامۋدىڭ بولاتىنى قالىپتى جاعداي عوي. تاربيەشىلەر, پەداگوگ ماماندار وزدەرىنە كەلگەن بالالاردى باسقا بالاباقشاعا جىبەرمەۋ ءۇشىن تىرىسادى, جانتالاسادى. سونىڭ ارقاسىندا بىلىكتىلىگىن ۇدايى جەتىلدىرىپ وتىرادى. بۇل شىن مانىندە ادال باسەكەلەستىكتى قالىپتاستىراتىنى انىق. جاڭا جوبا بۇقارا حالىق ءۇشىن سونىسىمەن دە ءتيىمدى بولىپ وتىرعانى داۋسىز», دەيدى «تولاعاي» بالاباقشاسىنىڭ باسشىسى گاۋھار كۇزەنباەۆا.
ۆاۋچەرلىق قارجىلاندىرۋ جۇيەسىنە قوسىلعان اتا-انا ءوز مۇمكىندىگىنە مۇقيات بولعانى ابزال. ول وزىنە تيەسىلى ءۇش مۇمكىندىكتى وتكىزىپ السا, بازا ونى اۆتوماتتى تۇردە كەزەكتىڭ سوڭىنا ءتۇسىرىپ جىبەرەدى ەكەن. جاڭا جوبا قولعا الىنعالى تارازدان كەيىن شىمكەنت, ورال جانە استانا قالالارى ۆاۋچەرلىق قارجىلاندىرۋ جۇيەسىنە قوسىلىپ ۇلگەرىپتى. اتقارىلعان جۇيەلى جۇمىس ناتيجەسىندە بالاباقشا كەزەگى 44 پايىزعا قىسقارعان كورىنەدى.
وقۋ-اعارتۋ مينيسترلىگى ۆاۋچەرلىق قارجىلاندىرۋ جۇيەسى وسى جىلدىڭ سوڭىنا دەيىن ەلىمىزدىڭ بارلىق وڭىرىندە ىسكە قوسىلاتىنىن راستاپ وتىر. قازىرگە دەيىن جاڭا جوبا وبلىستىق ماڭىزى بار 15 قالادا جانە ەكى وڭىردەگى 5 اۋداندا جۇزەگە اسىرىلىپ جاتىر ەكەن. بۇگىنگى كۇنگە دەيىن 3 مىڭنان استام مەكتەپكە دەيىنگى ۇيىمدى قامتىعان جۇيە نەگىزىندە 230 مىڭنان استام بالدىرعان بالاباقشاعا بارعان.
جامبىل وبلىسى