مەدياتسيا - قۇقىقتىق جۇيەنىڭ ماڭىزدى ەلەمەنتى

مەدياتسيا – داۋ-جانجالداردى سوتقا جەتكىزبەي, وركەنيەتتى جولمەن شەشۋدىڭ ءتيىمدى تەتىگى رەتىندە تۇراقتى دامىپ كەلە جاتقان ينستيتۋت. ەلىمىزدە 2011 جىلى قابىلدانعان «مەدياتسيا تۋرالى» زاڭ وسى سالانىڭ قۇقىقتىق نەگىزىن قالىپتاستىردى. ىزىنشە مەدياتسيا قۇقىقتىق جۇيەسىنىڭ ماڭىزدى ەلەمەنتى سانالىپ, تۇيتكىلدى شەشۋدىڭ بالاما ادىسىنە اينالدى.

13 جىل ىشىندە سالادا بىرقاتار ماڭىزدى وزگەرىستەر بولدى. قازىرگى تاڭدا مەدياتسيا جۇيەسى قۇرىلىمدىق ءارى مازمۇندىق تۇرعىدان جاڭعىرىپ جاتىر. وسى باعىتتا ۋاكىلەتتى ورگان رەتىندە مادەنيەت جانە اقپارات مينيسترلىگى مەملەكەتتىك ساياساتتى جۇيەلى ىسكە اسىرىپ كەلەدى.  

مينيسترلىك مەدياتور ۇيىمدارىنىڭ رەەسترىن جۇرگىزۋ, ولاردىڭ قىزمەتىن ۇيلەستىرۋ, رەەستردى جاڭارتۋ جانە قوعامدىق مەدياتورلاردىڭ جۇمىسىن تالداۋ باعىتىندا كەشەندى شارالار قابىلدايدى.

بۇگىندە رەسپۋبليكا كولەمىندە 23 مەدياتور ۇيىمى تىركەلگەن. جالپى 2000-نان استام كاسىبي مەدياتور ەڭبەك ەتەدى. سونىمەن قاتار, وڭىرلەردە 1800-دەن استام قوعامدىق مەدياتور حالىققا قۇقىقتىق كومەك كورسەتەدى. ماسەلەن, جىل باسىنان بەرى الەۋمەتتىك وسال توپتارعا 10 مىڭنان استام تەگىن كەڭەس بەرىلدى.

سونىمەن قاتار رەسپۋبليكا بويىنشا 98 مەدياتسيا كابينەتى جۇمىس ىستەيدى. ونىڭ بازاسىندا قۇقىقتىق كومەك كورسەتۋ, شيەلەنىستەردى شەشۋ جانە داعدارىس جاعدايلارىنان شىعۋعا قولداۋ ءبىلدىرۋ ماقساتىندا 900-دەن استام قوعامدىق قابىلداۋ ۇيىمداستىرىلدى.

داۋلاردى شەشۋدە ۇلتتىق ءداستۇر مەن مادەني ەرەكشەلىكتەردى ەسكەرۋ – ءتيىمدى شەشىم قابىلداۋدىڭ ماڭىزدى فاكتورى بولىپ وتىر. سوندىقتان ەلىمىزدە ەتنوستار اراسىنداعى ءوزارا تۇسىنىستىك پەن قوعامدىق كەلىسىمدى نىعايتۋ تۇرعىسىندا ەتنومەدياتسيا ەلەۋلى ۇلەس قوسىپ جاتىر. قوعامدىق مەدياتورلاردىڭ باسىم بولىگى ەتنومادەني بىرلەستىكتەرمەن تىعىز جۇمىس ىستەپ, ەتنوسارالىق شيەلەنىستەردىڭ الدىن الۋعا سەپتىگىن تيگىزىپ كەلەدى.