بۇۇ-نىڭ جاڭا دەرەكتەرىنە سايكەس, گازا سەكتورىنا جىبەرىلگەن گۋمانيتارلىق كومەكتىڭ شامامەن 86%-ى مۇقتاج جاندارعا جەتپەي, قارۋلى توپتار نەمەسە جەرگىلىكتى تۇرعىندار تاراپىنان ۇرلانىپ كەتەدى, دەپ حابارلايدى Egemen.kz The Fox باسىلىمىنا سىلتەمە جاساپ.
2025 جىلعى 19 مامىردان بەرى گازاعا ازىق-ت ۇلىك, ءدارى-دارمەك جانە باسقا دا العاشقى قاجەتتىلىكتەگى زاتتاردى تيەگەن 2013 جۇك كولىگى جەتكىزىلگەن. الايدا ولاردىڭ تەك 260-ى عانا ناقتى الۋشىلارعا جەتكەن. قالعان 1753 جۇك كولىگى پالەستينا اۋماعىندا نە كۇشپەن باسىپ الىنعان, نە ۇرلانعان. ەرەكشە كۇردەلى جاعداي 31 مامىردا ورىن العان – سول كۇنى 1695 توننا گۋمانيتارلىق كومەكتى الىپ كەلە جاتقان 90 جۇك كولىگى تونالعان.
بۇۇ-نىڭ جوبالىق قىزمەتتەر باسقارماسىنىڭ (UNOPS) وكىلدەرى كومەكتىڭ ۇرلانۋى ەكى ءتۇرلى جولمەن جۇرەتىنىن ايتادى: كەيدە اش ادامدار تاۋارلاردى تىكەلەي كەرۋەننەن بەيبىت جولمەن تارتىپ الادى, ال كەيدە قارۋلى توپتار كۇشپەن تارتىپ الادى.
ساراپشىلاردىڭ ايتۋىنشا, بۇل اۋقىمدى ۇرلىقتار گازا سەكتورىنداعى اسا اۋىر گۋمانيتارلىق داعدارىستى ودان ءارى ۋشىقتىرىپ وتىر. ازىق-ت ۇلىك پەن ءدارى-دارمەك تاپشىلىعى بەيبىت تۇرعىنداردىڭ ومىرىنە تىكەلەي قاۋىپ توندىرۋدە. حالىقارالىق ۇيىمدار جالعىز شەشىم – كومەكتى قاۋىپسىز جانە تۇراقتى جەتكىزۋ جولدارىن جولعا قويۋ دەپ سانايدى.
الايدا جاعدايدى قيىنداتىپ تۇرعانى – يزرايل مەن باتىس ساراپشىلارىنىڭ مالىمەتىنشە, كەيبىر قارۋلى توپتار گۋمانيتارلىق جۇكتىڭ جۇيەلى تۇردە تونالۋىنا قاتىسىپ, ونى قارا بازاردا ساتادى جانە سول ارقىلى ءوز قىزمەتىن قارجىلاندىرادى.
ەسكە سالايىق, يزرايل اسكەرى گازانىڭ ورتالىق بولىگىندەگى تۇرعىنداردى وڭتۇستىككە ەۆاكۋاتسيالانۋعا شاقىردى, سەبەبى دەير-ەل-بالاح قالاسىندا اسكەري وپەراتسيالاردى كەڭەيتۋ جوسپارلانعان. بۇۇ-نىڭ گۋمانيتارلىق ماسەلەلەردى ۇيلەستىرۋ باسقارماسى بۇل ارەكەتتى «جاپپاي قۋعىنداۋعا بۇيرىق» جانە «سوعىس شارپىعان ايماقتاعى گۋمانيتارلىق كۇش-جىگەرگە سوققى» دەپ قاتاڭ سىنعا الدى. ۇيىم مالىمەتىنشە, ەۆاكۋاتسيا تۋرالى مالىمدەمە جاسالعان ساتتە بۇل ايماقتا 50–80 مىڭ ادام بولعان, ولاردىڭ قاتارىندا شاتىرلاردا ءومىر ءسۇرىپ جاتقان مىڭداعان بوسقىن دا بار. قازىردىڭ وزىندە مىڭنان استام وتباسى قاقتىعىس ايماعىنان كەتۋگە ءماجبۇر بولعان.