كىشكەنتاي قىزدىڭ اناسى اتىراۋداعى بالاباقشادا قىزىنا كەلتىرىلگەن جاراقات جاعدايلارىن تەرگەۋدى سۇراپ وتىر, دەپ حابارلايدى Egemen.kz «اق جايىققا» سىلتەمە جاساپ.
وقيعا 28 شىلدە كۇنى بولعان. ايەلدىڭ ايتۋىنشا, تاربيەشى وعان قوڭىراۋ شالىپ, قىزىنىڭ باسپالداقتان تايىپ قۇلاپ كەتكەنىن ايتقان.
«ماعان بالامنىڭ باسى اۋىرىپ تۇرعانىن ايتىپ, دارىگەرگە كورسەتۋ كەرەك دەدى. جولداسىم ءبىرىنشى بولىپ باردى, مەن كەيىنىرەك جەتتىم. بارعانىمىزدا جانجال شىقتى, بىراق تۇسىنىكتەمە بەرۋدىڭ ورنىنا قىزمەتكەرلەر اقتالىپ, ءسوز تالاستىرا باستادى», دەيدى اناسى.
ونىڭ ايتۋىنشا, اتا-انالار بەينەباقىلاۋ كامەراسىنداعى جازبالاردى كورسەتۋىن سۇراعاندا, ولارعا «كامەرالار وشىرىلگەن, مونيتور ىستەمەيدى» دەپ جاۋاپ بەرگەن. وسى ساتتە قىز بالا ءوزىن جايسىز سەزىنە باستاعان. اتا-اناسى دەرەۋ جەدەل جاردەم شاقىرعان. اۋرۋحانادا رەنتگەن مەن كت جاسالىپ, باستىڭ سۇيەكتەرى ءبۇتىن ەكەنى انىقتالعان, بىراق دارىگەرلەر جابىق باس-مي جاراقاتىن جانە مي شايقالۋىن دياگنوز رەتىندە قويعان. كەيىنىرەك ەكى قولىندا دا سىنىقتار انىقتالعان.
«مەن اۋرۋحانادا ءوتىنىش جازدىم. ءبىز نەگە بەينەباقىلاۋ كامەرالارى جۇمىس ىستەمەي تۇرعانىن جانە بارلىق بولعان وقيعاعا كىم جاۋاپ بەرەتىنىن تۋرالى تۇسىنىكتەمە تالاپ ەتەمىز», دەيدى اناسى.
پوليتسيا اتالعان دەرەك بويىنشا قر قىلمىستىق كودەكسىنىڭ 140-بابى 2-بولىگى «بالالاردىڭ ءومىرى مەن دەنساۋلىعى قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ» بويىنشا قىلمىستىق ءىس تىركەلىپ, تەرگەۋ جۇرگىزىلىپ جاتقانىن مالىمدەدى.