حالىقارالىق ۇستەل تەننيسى فەدەراتسياسىنىڭ (ITTF) تورەشىلەر كوميتەتىنىڭ حابارلاۋىنشا جاس تورەشىلەرگە ارنالعان جاڭا جوبا باستالدى. ۇمىتكەرلەر – سەنەگالدىڭ داكار قالاسىندا جاسوسپىرىمدەر اراسىندا 2026 جىلى وتەتىن وليمپيادا ويىندارىنا تورەشى رەتىندە قاتىسۋعا ىرىكتەلەدى, دەپ جازادى Egemen.kz.
ۇلتتىق وليمپيادا كوميتەتىنىڭ مالىمەتىنشە ىرىكتەۋ ەكى كەزەڭنەن تۇرادى:
I كەزەڭ (2025 جىلعى تامىز-جەلتوقسان): ITTF ساراپشىلارىنىڭ جەتەكشىلىگىمەن ونلاين تالىمگەرلىك, قاجەتتى ءبىلىم-داعدىلاردى مەڭگەرۋ.
II كەزەڭ (2026 جىلعى قاڭتار-تامىز): ونلاين سەمينارلار, جوبالاردى باعالاۋ جانە ناقتى جاعدايداعى تاجىريبەلەر.
2026 جىلعى قازان ايىندا داكار قالاسىندا قورىتىندى وقىتۋ وتكىزىلمەك.
قازاقستان ۇستەل تەننيسى فەدەراتسياسى ITTF تالاپتارىنا سايكەسەتىن ەكى ۇمىتكەردى ۇسىنعان, ولار – حالىقارالىق ساناتتاعى تورەشى ديلناز جالالدين (الماتى) جانە اربيتر ارتيوم ورەل (قاراعاندى).