الماتىداعى «Alatay Creative Hub» ورتالىعىندا قازاق جازۋشىلارىنىڭ قىرعىز تىلىنە اۋدارىلعان «پاندەميا دۇربەلەڭى» اتتى اڭگىمەلەر جيناعىنىڭ جانە قىرعىز جازۋشىلارىنىڭ قازاق تىلىنە اۋدارىلعان «كۇننىڭ كوزىن كورگىم كەلەدى» اڭگىمەلەر جيناعىنىڭ تانىستىرىلىمى ءوتتى.
جوبا اۆتورلارى – قازاق اقىنى, اۋدارماشى, ادەبي اگەنت سايات قامشىگەر مەن قىرعىز عالىمى, اۋدارماشى, ادەبي اگەنت قيالبەك اقماتوۆ. قىرعىز ەلىنىڭ جازۋشىلارىن حالىق جازۋشىسى توپشىگۇل شايدۋللاەۆا باستاپ كەلسە, ولاردى قازاقستان جازۋشىلار وداعى باسقارماسى توراعاسىنىڭ ورىنباسارى قاسىمحان بەگمانوۆ قارسى الىپ, ەكى ەلدىڭ ادەبي بايلانىسى تۋرالى تەرەڭنەن تولعاپ, كوركەم ادەبيەتتىڭ بۇگىنگى جاي-كۇيى جونىندە اڭگىمە ساباقتادى.
قازاق-قىرعىز ادەبي بايلانىستارىنىڭ جاندانىپ, دامۋىنا ۇلەس قوساتىن بۇل ەكى جيناقتىڭ تاۋەلسىزدىك العالى بەرى تۇڭعىش شىعىپ وتىرعانىن باسا ايتقان ءجون. قازاق جازۋشىلارىنىڭ قىرعىز تىلىنە اۋدارىلعان «پاندەميا دۇربەلەڭى» اڭگىمەلەر جيناعىنا 27 قالامگەردىڭ تاڭداۋلى اڭگىمەسى ەندى. جيناق ىشىنە ناعاشىبەك قاپالبەك ۇلى, توكەن الجانتەگى, اسىلبەك يحسان, جابال ەرعاليەۆ, قايىم-مۇنار تابەەۆ, ءدىلدار مامىرباەۆا, ساۋلە دوسجان, نۇرلان قامي, ابدىلدابەك سالىقباي, تۇراق اديس ۇلى, داۋلەتبەك بايتۇرسىن ۇلى, ايگۇل كەمەلباەۆا, سەرىك نۇعىمان, نۇرلىبەك سامات ۇلى, ءجادي شاكەن ۇلى, ميرا شۇيىنشاليەۆا, گۇلزات شويبەكوۆا, نۇرجان قۋانتاي ۇلى, ساكەن سىبانباي, ەربولات ابىكەن ۇلى, ۇلاربەك دالەي ۇلى, جايناگۇل بەكنياز, ەسبولات ايدابوسىن, ايگۇل جۇبانىش, الىبەك بايبول, ابىلايحان ەسىمباي, نۇربەك نۇرجان ۇلىنىڭ اڭگىمەلەرى توپتاستىرىلعان.
قازاق جازۋشىلارىنىڭ اڭگىمەلەرى قىرعىز وقىرماندارىنىڭ كوڭىلىنەن شىعىپ, جۇرەكتەن ورىن العانى قۋانارلىق جاعداي. ءومىر, ءولىم, تاعدىر, ماحاببات, كۇندەلىكتى كۇيبەڭ تىرلىكتەگى الۋان وقيعالاردى شەبەر سۋرەتتەگەن قازاق قالامگەرلەرىنىڭ ىزدەنىسى, شەبەرلىگى تۋىسقان حالىقتىڭ سىنشىلارىنان, ادەبيەتتانۋشى-عالىمدارىنان وڭ باعاسىن العان.
قىرعىز جازۋشىلارىنىڭ قازاق تىلىنە اۋدارىلعان «كۇننىڭ كوزىن كورگىم كەلەدى» اڭگىمەلەر جيناعىنا زيناگۇل پاسانوۆا, ءابدىلاميت ماتىساقوۆ, ابدىكەرىم مۇراتوۆ, سۇلتان راەۆ, قانىبەك يماناليەۆ سياقتى 24 قالامگەردىڭ تاڭداۋلى اڭگىمەسى ەنگەن. قىرعىز پروزاسىنىڭ قازىرگى جاي-كۇيىن, دامۋىن وقىرمان وسى اڭگىمەلەردەن اڭعارادى. جيناقتاعى اڭگىمەلەر ءومىردىڭ ءتۇرلى ساتتەرىن, قيلى تاعدىرلاردى ارقاۋ ەتكەن. تۋىسقان قىرعىز ادەبيەتىندەگى ماسەلەلەر مەن كوتەرگەن تاقىرىپتار, وقيعالار قازاققا دا جات ەمەس.
قىرعىز بەن قازاققا ورتاق قوس كىتاپتىڭ العاشقى دانالارى 25 شىلدەدە بىشكەك قالاسىندا سۇيىنشىلەنسە, ەندى مىنە, ەكى جيناق تا اۆتورلاردىڭ قاتىسۋىمەن الماتىدا تانىستىرىلدى. قىرعىز ەلىندەگى ءىس-شاراعا 11 قازاق جازۋشىسى قاتىسسا, بۇل جولى اڭگىمەلەرى قازاق تىلىنە اۋدارىلعان قىرعىزدىڭ 10 جازۋشىسى وسى تۇساۋكەسەرگە ارنايى كەلدى. ءبىر تۋعان ەكى حالىقتىڭ ادەبي دوستىعىن تۋ ەتكەن رۋحاني كەشتىڭ سوڭىندا ق.احماتوۆ قىرعىز جازۋشىلارىنىڭ اڭگىمەلەرىن قازاق تىلىنە اۋدارعان قالامگەرلەردى ءوزى باسقاراتىن «تااليم» باسپا ءۇيىنىڭ العىسحاتىمەن ماراپاتتادى. كىتاپحاناداعى كەزدەسۋ سوڭى مەيمانداردىڭ ادەبيەت تۋرالى ەركىن پىكىر الماسىپ, سۋرەتكە ءتۇسىپ, شاھاردىڭ كورىكتى ورىندارىن ارالاۋىمەن جالعاستى.
الماتى