مەملەكەت باسشىسى قاسىم-جومارت توقاەۆ ەكى جىل بۇرىن «زاڭسىز يەمدەنگەن اكتيۆتەردى مەملەكەتكە قايتارۋ تۋرالى» زاڭعا قول قويعانى بەلگىلى. الەۋمەتتىك ادىلدىكتى ورناتىپ, زاڭسىز يەمدەنگەن قاراجاتتى مەملەكەت مەنشىگىنە قايتارۋدى كوكسەگەن زاڭ اياسىندا جامبىل وڭىرىندە ءبىرشاما جۇمىس اتقارىلدى.
جەرگىلىكتى اتقارۋشى بيلىك وكىلدەرى مەن پروكۋراتۋرا قىزمەتكەرلەرى ءبىرىنشى كەزەكتە شالعاي اۋىلدارداعى اۋىزسۋ جانە مەديتسينالىق نىسان ماسەلەسىن شەشۋگە باسىمدىق بەرىپ وتىر. ناقتىراق ايتساق, شالعايداعى اۋىلداردىڭ وزەكتى پروبلەمالارىن دەر كەزىندە شەشۋ – باستى ماقسات.
ءبىرشاما ۋاقىت بۇرىن جامبىل وبلىسىنىڭ پروكۋرورى نۇرعالىم ءابدىروۆ قورداي اۋدانىنا قاراستى ۇلكەن ءسۇلۋتور اۋىلىندا بوي كوتەرگەن جاڭا دارىگەرلىك امبۋلاتوريانىڭ اشىلۋ سالتاناتىنا قاتىسىپ, زاڭسىز قولدى بولعان اكتيۆتەردى قايتارۋ باعىتىندا اتقارىلىپ جاتقان جۇمىس تۋرالى حاباردار ەتتى. ونىڭ ايتۋىنشا, قايتارىلعان اكتيۆتەر ەسەبىنەن 19 اۋىزسۋمەن قامتاماسىز ەتۋ جانە دەنساۋلىق ساقتاۋ نىسانىنىڭ قۇرىلىسى قارجىلاندىرىلعان. بۇل باعىتتاعى جۇمىس الداعى ۋاقىتتا دا قارقىندى تۇردە جۇرگىزىلمەك.
«پروكۋراتۋرا ورگاندارى تاراپىنان زاڭسىز شىعارىلعان اكتيۆتەردى قايتارۋ باعىتىندا اتقارىلىپ جاتقان جۇمىس ىلكى ساتكە دە توقتاماق ەمەس. جامبىل وڭىرىندە قايتارىلعان اكتيۆتەر ەسەبىنەن الەۋمەتتىك ماڭىزدى ينفراقۇرىلىمدى دامىتۋ بويىنشا ءتيىستى ءىس-شارالار قابىلداندى. بىرقاتار نىساننىڭ جۇمىسى جۇيەلى جۇرگىزىلىپ جاتىر. ونىڭ جارقىن مىسالى – مەديتسينالىق كومەكپەن شالعاي اۋىلداردى قامتۋ. ويتكەنى شالعايداعى اۋىل تۇرعىندارى ءبىرىنشى كەزەكتە مەديتسينالىق نىسان كەرەك ەكەنىن العا تارتىپ وتىر», دەيدى ول.
پرەزيدەنت باستاماسىمەن قولعا الىنعان جۇمىستىڭ شاراپاتىن جامبىل اۋدانىنا قاراستى جاڭاوتكەل اۋىلىنىڭ تۇرىندارى دا سەزىنىپ وتىر. جىلدار بويى تازا سۋدىڭ تاۋقىمەتىن تارتقان ەلدى مەكەن تۇرعىندارى اتقارىلعان جۇمىسقا ءدان ريزا. ويتكەنى تاياۋدا اتالعان اۋىلدا سۋمەن جابدىقتاۋ جۇيەسى ىسكە قوسىلدى. جاڭا نىسان ىسكە قوسىلعانعا دەيىن جاڭاوتكەلدىكتەر اۋىزسۋمەن قامتىلماعان ەدى. قايتارىلعان اكتيۆتەر ەسەبىنەن اتقارىلعان جۇمىستىڭ ارقاسىندا ەلدى مەكەندەگى 260 تۇرعىن اۋىزسۋدىڭ ازابىنان قۇتىلدى.
جالپى العاندا, وڭىردە قايتارىلعان اكتيۆتەر ەسەبىنەن اۋىز تولتىرىپ ايتارلىقتاي جۇمىس اتقارىلىپ جاتقانى ءمالىم. ءبىرشاما ۋاقىت بۇرىن ءوڭىردىڭ بىرنەشە اۋدانىندا شاعىن ەلدى مەكەندەردى اۋىزسۋمەن قامتۋ ءۇشىن ناقتى جۇمىس باستالىپ كەتتى. ماسەلەن, مامىر ايىنىڭ اياق تۇسىندا ىرگەدەگى بايزاق اۋدانىنا قاراستى جالعىزتوبە اۋىلدىق وكرۋگىندەگى تورتكول ەلدى مەكەنىندە سۋ قۇبىرى جەلىلەرى مەن سۋ جيناۋ نىسانىن سالۋ جۇمىسى باستالدى. رەسمي دەرەككە جۇگىنسەك, جوبانى جۇزەگە اسىرۋ ارقىلى شاعىن اۋىلداعى 274 تۇرعىندى ساپالى اۋىزسۋمەن قامتاماسىز ەتۋ مۇمكىندىگى تۋماق.
بۇعان قوسا شۋ اۋدانىنا قاراستى «گورگاز» شاعىن اۋدانىن ساپالى اۋىزسۋمەن قامتۋ بويىنشا دا ناقتى جۇمىس اتقارىلىپ جاتىر. جالپى, قايتارىلعان كاپيتالدى حالىق يگىلىگى ءۇشىن ءتيىمدى پايدالانۋ ماقساتىندا شۋ اۋدانىندا 5 اۋىزسۋ جوباسىن ىسكە اسىرۋ ءۇشىن قاراجات بەرىلگەن. قازىرگى كەزدە 3 جوبانىڭ جۇمىسى باستالعان.
قورداي اۋدانىنا قاراستى ۇلكەن ءسۇلۋتور اۋىلىندا پايدالانۋعا بەرىلگەن مەديتسينالىق نىسان قىزمەتكەرلەرى العاشقى دارىگەرلىك جانە دارىگەرگە دەيىنگى كومەك كورسەتۋگە قاۋقارلى. امبۋلاتوريا زاماناۋي مەديتسينالىق قۇرال-جابدىقتارمەن قامتىلعان. مۇندا فيزيوتەراپيا, وڭالتۋ جانە ەكگ كابينەتتەرى بار. بۇعان دەيىن اۋىل حالقى 1959 جىلى پايدالانۋعا بەرىلگەن ەسكى عيماراتقا بارىپ ءجۇرىپتى.
قالاي دەسەك تە, شالعايداعى اۋىل تۇرعىندارى قايتارىلعان اكتيۆتىڭ پايداسىن كورىپ وتىرعانى انىق. ويتكەنى قۇزىرلى مەكەمە قىزمەتكەرلەرى الدىمەن الىستاعى اعايىنعا قاجەتتى الەۋمەتتىك نىساندار سالۋعا باسىمدىق بەرىپ وتىر. بۇل جۇمىس جىل بويى جۇرگىزىلمەك.
جامبىل وبلىسى