مەملەكەت باسشىسى قاسىم-جومارت توقاەۆ «قازاقستان تەمىر جولى» ۇك» اق باسقارما توراعاسى تالعات الدىبەرگەنوۆتى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتكە ۇلتتىق كومپانيا قىزمەتىنىڭ ناتيجەلەرى تۋرالى مالىمەت بەرىلدى. تالعات الدىبەرگەنوۆتىڭ ايتۋىنشا, بيىلعى ءبىرىنشى جارتىجىلدىقتىڭ قورىتىندىسى بويىنشا ەكسپلۋاتاتسيالىق جۇك اينالىمى 8,6 پايىزعا ۇلعايعان. ترانزيت تاسىمالىنىڭ كولەمى 14,6 ميلليون تونناعا جەتكەن.
قاسىم-جومارت توقاەۆقا ترانسۇلتتىق تەمىرجول ءدالىزىن قالىپتاستىرۋ ءۇشىن 1700 شاقىرىمنان استام جاڭا جەلى سالىنىپ, 3 مىڭ شاقىرىم جول جاڭعىرتىلىپ جاتقانى تۋرالى باياندالدى. بيىل دوستىق-مويىنتى ۋچاسكەسىندەگى جولدىڭ ەكىنشى بولىگى جانە الماتى بەكەتىن اينالىپ وتەتىن تەمىر جول جەلىسىنىڭ قۇرىلىسى اياقتالادى. داربازا – ماقتاارال جوباسىن ىسكە اسىرۋ جالعاسۋدا. باقتى – اياگوز جانە قىزىلجار – مويىنتى جەلىلەرىنىڭ قۇرىلىسى باستالدى.
مەملەكەت باسشىسىنا تەرمينال جەلىلەرىن كەڭەيتۋ جۇمىستارى جۇرگىزىلىپ جاتقانى جونىندە مالىمەت بەرىلدى. قازاقستاننىڭ قىتاي, رەسەي, ماجارستان, بەلارۋس, ازەربايجان جانە گرۋزيا سياقتى ەلدەردىڭ جۇك جينالاتىن نەگىزگى ورتالىقتارىمەن قارىم-قاتىناس جاساۋى لوگيستيكانى وڭتايلاندىرىپ, شىعىس – باتىس جانە سولتۇستىك – وڭتۇستىك باعىتتارىنداعى تاسىمالدىڭ تيىمدىلىگىن ارتتىرادى.
كەزدەسۋدە تسيفرلاندىرۋ ماسەلەسىنە ايرىقشا نازار اۋدارىلدى. الەمدىك دەڭگەيدەگى يننوۆاتسيانىڭ كوشباسشىلارىمەن بىرلەسىپ, تەمىرجول كولىگىنىڭ ساپاسىن جاقسارتۋ جانە قاۋىپسىزدىگىن قامتاماسىز ەتۋ جۇمىستارى قولعا الىنعان. ترانسكاسپي حالىقارالىق كولىك دالىزىندەگى ترانزيتتىك دەكلاراتسيالاۋدى اۆتوماتتاندىرۋ لوگيستيكالىق وپەراتسيالاردىڭ اشىقتىعىن قامتاماسىز ەتىپ, جۇكتى جەتكىزۋ مەرزىمىن جەدەلدەتتى. دەكلاراتسيانى رەسىمدەۋ ۋاقىتى 8 ساعاتتان 30 مينۋتقا دەيىن قىسقاردى.
مەملەكەت باسشىسى قازاقستاننىڭ ترانزيت الەۋەتىن جانە ەكونوميكاسىن دامىتۋدا كومپانيا ۇلكەن ءرول اتقاراتىنىن اتاپ ءوتىپ, كولىك ينفراقۇرىلىمىن ودان ءارى جاڭعىرتۋدىڭ ماڭىزىنا توقتالدى.