بۇگىن ۇكىمەتتە ءوتىپ جاتقان باسپاسوز كونفەرەنتسياسىندا پرەمەر-ءمينيستردىڭ ءبىرىنشى ورىنباسارى رومان سكليار جانارماي باعاسىن كورشى مەملەكەتتەرمەن تەڭەستىرۋ جوسپارلانىپ وتىرعانىن ايتتى, دەپ جازادى Egemen.kz.
رومان سكليار بۇل قادام جانارمايدىڭ سىرتقا ساتىلىپ كەتپەۋى ءۇشىن جاسالاتىنىن ءتۇسىندىردى.
«ىشكى ءوندىرىستى ۇلعايتۋ جوسپارىنا كەلسەك, شىمكەنت مۇناي وڭدەۋ زاۋىتىنىڭ ەكىنشى كەزەگىن سالۋ جوسپارلانىپ وتىر. بۇل شىمكەنتتە مۇناي وڭدەۋ كولەمىن 6 ملن توننادان 12 ملن تونناعا دەيىن ۇلعايتۋعا مۇمكىندىك بەرەدى. سونداي-اق, پاۆلودار جانە اتىراۋ زاۋىتتارىنىڭ قۋاتىن ارتتىرۋ باعىتىندا ءىس-شارالار قولعا الىنادى», دەدى پرەمەر-ءمينيستردىڭ ءبىرىنشى ورىنباسارى.
قازاقستاندا جىلىنا 85-90 ملن توننا مۇناي وندىرىلەدى. بۇل رەتتە ەلىمىزدە سۇرانىس ۇسىنىستان اسىپ تۇسەدى. بۇل ماسەلەنى شەشۋ ءۇشىن 2017-2019 جىلدار ارالىعىندا ءۇش قازاقستاندىق مۇناي وڭدەۋ زاۋىتىن رەكونسترۋكتسيالاۋ ءساتتى اياقتالدى, بۇل ءوندىرىس كولەمىن ەداۋىر ارتتىرۋعا مۇمكىندىك بەرگەن. بۇل 2019 جىلعا قاراي بەنزين, ديزەل جانە اۆياكەروسين تاپشىلىعىن توقتاتتى.پرەمەر-ءمينيستردىڭ ءبىرىنشى ورىنباسارىنىڭ ايتۋىنشا, تۇتىنۋدىڭ ارتۋىنا بايلانىستى اۆياكەروسيندى ءالى دە يمپورتتاۋعا تۋرا كەلەدى. سونىمەن قاتار كورشى ەلدەرمەن سالىستىرعاندا قازاقستاندا بەنزين مەن ديزەل وتىنىنىڭ تومەن باعاسى ولاردىڭ زاڭدى جانە كونتراباندالىق جولدارمەن كەتۋىنە اكەلىپ سوعادى, بۇل ىشكى تاپشىلىقتى تۋدىرادى.