الداعى 26–28 شىلدە ارالىعىندا ەل اۋماعىندا اۋا رايى قۇبىلمالى بولادى. بۇل تۋرالى «قازگيدرومەت» رمك ءباسپاسوز قىزمەتى حابارلادى, دەپ جازادى Egemen.kz.
سينوپتيكتەردىڭ مالىمەتىنشە, ەلىمىزدىڭ ۇستىنەن وتەتىن تسيكلون اسەرىنەن كوپتەگەن وڭىردە بۇلتتى, بىراق اراگىدىك اشىق كۇن رايى كۇتىلەدى. كوپتەگەن ايماقتا نايزاعايلى جاڭبىر جاۋىپ, رەسپۋبليكانىڭ سولتۇستىك-باتىسىندا, سولتۇستىگىندە جانە ورتالىعىندا نوسەر جاۋىن, بۇرشاق جانە داۋىل بولۋى ىقتيمال.
«رەسپۋبليكانىڭ بارلىق اۋماعىندا جەل كۇشەيەدى, ال وڭتۇستىك وڭىرلەردە – شاڭدى داۋىل تۇرۋى مۇمكىن», دەلىنگەن جۇما كۇنى جاريالانعان اۋا رايى بولجامىندا.
تەمپەراتۋرالىق فون ايتارلىقتاي وزگەرمەيدى. الايدا شىعىس جانە وڭتۇستىك-شىعىس وڭىرلەردە اپتاپ ىستىق ساقتالادى – كەي جەرلەردە +42 گرادۋسقا دەيىن جەتۋى ىقتيمال.