باكۋدە قازاق كينوسىنىڭ ءبىر ايلىق ماۋسىمى باستالدى. سالتاناتتى ءىس-شارا «دوس-مۇقاسان» مۋزىكالىق دراماسىمەن اشىلدى. رەجيسسەر ايدىن ساحاماننىڭ ءفيلمى ەلدىڭ مۋزىكا ونەرىنە جاڭا سەرپىن بەرگەن, قازاق روكىنىڭ نەگىزىن قالاۋشى تانىمال قازاقستاندىق انسامبلگە ارنالادى, دەپ جازادى Egemen.kz.
ءىس-شارا اياسىندا ازەربايجاندىق تالانتتى انشىلەر مەن مۋزىكانتتاردىڭ قاتىسۋىمەن كونتسەرتتىك باعدارلاما ۇيىمداستىرىلىپ, بۇل كەش قوس حالىق اراسىنداعى مادەني بايلانىستىڭ ايقىن كورىنىسىنە اينالدى.
كەشكە ازەربايجان رەسپۋبليكاسىنداعى توتەنشە جانە وكىلەتتى ەلشىسى ءالىم بايەل, شىعارماشىلىق جانە عىلىمي زيالى قاۋىم وكىلدەرى, ديپلوماتيالىق كورپۋس مۇشەلەرى, باق, باكۋدە تۇراتىن قازاقستاندىقتار مەن قازاق كينوسىن قولداۋشىلار قاتىستى.
«دوس-مۇقاسان» ءفيلمى ەفرات ءشارىپوۆتىڭ ستسەناريى نەگىزىندە مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن. تۋىندىنىڭ پروديۋسەرى – ايگۇل بايبەك.
فيلم جەلىسى پوليتەحنيكالىق ينستيتۋتتىڭ ستۋدەنتتەرى قۇرعان انسامبل تاريحىن باياندايدى. جاس مۋزىكانتتاردىڭ ونەر مەن عىلىم اراسىنداعى كۇردەلى تاڭداۋى, كونتسەرتتەرگە تىيىم سالۋ, پارتيا تاراپىنان قىسىم, وقۋ ورنىنداعى قيىندىقتار سەكىلدى شىنايى ومىرلىك كەدەرگىلەر كورىنىس تابادى.
كينوتۋىندىدا كەيىپكەرلەردىڭ تاريحي بەينەسىن ءدال بەرۋ ءۇشىن اكتەرلەر ناقتى پروتوتيپتەرگە ساي تاڭدالعان. تۋىندىنىڭ تاريحي شىندىققا ساي بولۋ ءۇشىن انسامبل مۇشەلەرى مۇرات قۇسايىنوۆ پەن دوسىم سۇلەيمەنوۆ ارنايى كەڭەسشى رەتىندە شاقىرىلعان.
باكۋ قالاسىندا ءوتىپ جاتقان قازاقستان كينوسى ايلىعى اياسىندا ەلىمىزدىڭ زاماناۋي كينوونەرىنىڭ سان قىرىن تانىتاتىن باسقا دا تۋىندىلاردىڭ كورسەتىلىمى جوسپارلانعان.