قاراساي اۋدانىندا 47 ەلدى مەكەن بار, ولاردىڭ 38-ىندە مەديتسينالىق مەكەمەلەر جۇمىس ىستەيدى. الايدا 9 ەلدى مەكەندە حالىق ءالى كۇنگە دەيىن ءتيىستى مەديتسينالىق قىزمەتكە قول جەتكىزە الماي وتىر. سونىمەن قاتار جۇمىس ىستەپ تۇرعان 38 مەكەمەنىڭ 5-ەۋى جالعا الىنعان عيماراتتاردا ورنالاسقان, بۇل ولاردىڭ ءتيىمدى جۇمىس ىستەۋىنە ايتارلىقتاي كەدەرگى كەلتىرەدى. ونىڭ ىشىندە 18 نىسان 40 جىلدان استام ۋاقىت بۇرىن سالىنعان, تەحنيكالىق جاعدايى قازىرگى تالاپتارعا ساي كەلمەيدى, كۇردەلى جوندەۋدى قاجەت ەتەدى.
وسىنى ەسكەرە وتىرىپ, اۋدان كولەمىندە 15 جاڭا مەديتسينالىق مەكەمە سالۋ, 3 نىسانعا كۇردەلى جوندەۋ جۇرگىزۋ قاجەتتىلىگى تۋىنداعان. قازىرگى ۋاقىتتا اۋداننىڭ اباي, ۇشتەرەك, قاراتوبە اۋىلدارىندا 3 مەديتسينالىق نىساننىڭ قۇرىلىسى جۇرگىزىلىپ جاتىر. سونىمەن قاتار قاينار, بەكبولات, شالقار, ۇلان اۋىلدارىندا 50 ادام قابىلداۋعا قاۋقارلى دارىگەرلىك امبۋلاتوريالاردىڭ جوبالىق-سمەتالىق قۇجاتتامالارى ازىرلەنگەن. بۇل تۋرالى قاراساي اۋدانىنىڭ اقسەڭگىر, كوكتوعان اۋىلدارىنان وتباسىلىق دەنساۋلىق ساقتاۋ ورتالىعىنىڭ اشىلۋ سالتاناتىندا اۋدان اكىمى جاسۇلان ەستەنوۆ حاباردار ەتتى. راسىمگە وبلىستىق دەنساۋلىق ساقتاۋ باسقارماسىنىڭ باسشىسى ەرجان سۇلەيمەنوۆ, ءماجىلىس دەپۋتاتى اناس باققوجاەۆ, «Nova invest» جشس باس ديرەكتورى قارلىعاش يبراەۆا قاتىستى.
ءار ورتالىقتىڭ جالپى اۋدانى 100 شارشى مەتردەن اسادى. وندا تىركەۋ ءبولىمى, جالپى تاجىريبە دارىگەرلەرى مەن بەيىندى ماماندار قابىلدايتىن جەتى بولمە بار. ورتالىقتار شامامەن 3 000 تۇرعىنعا قىزمەت كورسەتەدى.
«نىسان اۋىل تۇرعىندارىن ساپالى ءارى قولجەتىمدى العاشقى مەديتسينالىق سانيتارلىق كومەكپەن قامتاماسىز ەتۋ ماقساتىندا سالىندى. قۇرىلىس جوباسىن قارجىلاندىرۋ – مەملەكەتتىك-جەكەمەنشىك ارىپتeستىك تەتىكتەرى ەسەبىنەن, «NOVA INVEST» جاۋاپكەرشىلىگى شەكتەۋلى سەرىكتەستىگى جۇرگىزدى. ينۆەستيتسيا كولەمى 49 ملن تەڭگەنى قۇرادى. ەلتاي اۋىلدىق وكرۋگىندە جالپى سانى 24 555 تۇرعىن بار. اقسەڭگىر اۋىلىنا قىزمەت كورسەتەتىن ۋچاسكەگە 1 340 ادام تىركەلگەن. بۇرىن اۋىل تۇرعىندارىنا مەديتسينالىق كومەك 1958 جىلى سالىنعان, قازىرگى زامانعى تالاپقا ساي كەلمەيتىن, ەسكى عيماراتتا كورسەتىلگەن. جاڭا نىسان زاماناۋي ينجەنەرلىك جەلىلەرمەن, مەديتسينالىق قۇرالدارمەن, قاجەتتى كابينەتتەرمەن تولىق جابدىقتالعان. مەديتسينالىق مەكەمە كۇنىنە 30 ادامعا دەيىن قابىلداي الادى. مۇندا العاشقى مەديتسينالىق-سانيتارلىق كومەك كورسەتۋ, كەڭەس بەرۋ, دياگنوستيكالىق قىزمەتتەر مەن زەرتحانالىق تالداۋلار جۇرگىزۋ مۇمكىندىگى قاراستىرىلعان. ورتالىقتا 1 جالپى تاجىريبەلى دارىگەر, 4 ورتا بۋىن مەديتسينا قىزمەتكەرى, 1 بىلىكتى اكۋشەر قىزمەت ەتەدى. سونىمەن قاتار بۇگىن ءدال وسىنداي مەديتسينالىق مەكەمە كوكتوعان اۋلىندا دا اشىلدى. بۇل – اۋداننىڭ مەديتسينالىق قىزمەت ساپاسىن ارتتىرۋعا باعىتتالعان جۇيەلى جۇمىستاردىڭ ناقتى ناتيجەسى», دەدى اۋدان اكىمى.
كوكتوعان اۋلىنا قىزمەت كورسەتەتىن ۋچاسكەگە 1 516 ادام تىركەلگەن. بۇرىن بۇل اۋىلدا مەديتسينالىق مەكەمە مۇلدەم بولماعان. مەديتسينالىق كومەك ۋچاسكەلىك قىزمەتپەن ءۇي جاعدايىندا عانا كورسەتىلىپ كەلگەن.
بيىل كۇزدە كەمەرتوعان, كوكوزەك اۋىلدارىندا تاعى ەكى جاڭا نىسان پايدالانۋعا بەرىلەدى.
الماتى وبلىسى