2025 جىلعى 17-23 شىلدە ارالىعىندا مالديۆ ارالدارىنىڭ استاناسى مالە قالاسىندا وتكەن ورتالىق ازيا چەمپيوندار ليگاسىندا قازاقستاننىڭ نامىسىن ورال قالاسىنىڭ «Jaiyq» ۆولەيبول كلۋبى ابىرويمەن قورعاپ شىقتى, دەپ حابارلايدى Egemen.kz.
ازيا قۇرلىعىنداعى بەدەلدى دوداعا بيىل 5 مەملەكەتتەن 6 ۇزدىك كوماندا قاتىسقان ەدى. بقو دەنە شىنىقتىرۋ جانە سپورت باسقارماسى ءباسپاسوز قىزمەتىنىڭ حابارلاۋىنشا, باسەكە وتە قىزۋ بولعان. قازاقستان اتىنان سىنعا تۇسكەن «Jaiyq» كلۋبى ەلىمىزدىڭ تاجىريبەلى باپكەرى ۆيكتور كوزيكتىڭ جەتەكشىلىگىمەن ءساتتى ونەر كورسەتىپ, ەل ۆولەيبولىنىڭ بەدەلىن تاعى ءبىر مارتە اسقاقتاتتى.
ءبىر اپتا بويى وتكەن تارتىستى چەمپيوناتتا «Jaiyq» كومانداسى Kirgyzstan كلۋبىن, جەرگىلىكتى Club HDC جانە Dhivehi Sifainge club كوماندالارىن 3:0 ەسەبىمەن, شري-لانكانىڭ Ports Authority كومانداسىن 3:1 ەسەبىمەن جەڭگەن. جالپى تۋرنير بارىسىندا 6 ماتچتىڭ 5-ەۋىندە جەڭىسكە جەتكەن «Jaiyq» كلۋبى ورتالىق ازيا دەڭگەيىندە ۇزدىك ەكەنىن دالەلدەپ شىققان.
تۋرنير قورىتىندىسى بويىنشا دا «Jaiyq» كلۋبىنىڭ بىرنەشە ويىنشىسى ۇزدىكتەر قاتارىنان كورىندى. اتاپ ايتقاندا ۆيتالي ەردشتەين – ءتۋرنيردىڭ ۇزدىك ويىنشىسى, سونداي-اق ۇزدىك دياگونالشى اتانسا, ۆولوديمير كوۆالچۋك – ۇزدىك بايلانىستىرۋشى, ۆلاديمير پروكوفەۆ – ۇزدىك شابۋىلشى دەگەن اتاققا يە بولدى.
«بۇل تۋرنير – ءبىز ءۇشىن تەك جارىس ەمەس, ەلىمىزدىڭ نامىسىن قورعاۋ جولىنداعى ماڭىزدى قادام بولدى. جەڭىستەرىمىز – بۇكىل قازاقستان ۆولەيبولىنىڭ جەڭىسى», – دەيدى كلۋب ديرەكتورى ازامات نۇرمۇحانبەتوۆ.
باتىس قازاقستان وبلىسى