مەديتسينا قىزمەتكەرلەرىنىڭ قۇقى مەن قاۋىپسىزدىگى حاقىندا

وعان پرەمەر-ءمينيستردىڭ ورىنباسارى ەرمەك كوشەرباەۆ, دەنساۋلىق ساقتاۋ ءمينيسترى اقمارال ءالنازاروۆا, ىشكى ىستەر ءمينيسترى ەرجان سادەنوۆ جانە ادىلەت ۆيتسە-ءمينيسترى لاۋرا مەرساليموۆا قاتىستى.

دەنساۋلىق ساقتاۋ مينيسترلىگىنىڭ مالىمەتىنشە, 2019 جىلدان بەرى ەلىمىزدە دارىگەرلەرگە, فەلدشەرلەرگە, مەدبيكەلەرگە جانە باسقا دا دەنساۋلىق ساق­تاۋ قىزمەتكەرلەرىنە جاسالعان شابۋىل­داردىڭ 170-تەن استام فاكتىسى تىركەلگەن.

دەنساۋلىق ساقتاۋ ءمينيسترى حابار­لاعانداي, دارىگەرلەرگە جاسالعان شابۋىلداردى قۇقىق قورعاۋ ورگاندارى قىزمەت­كەر­لەرىنىڭ جەكە باسىنا قاۋىپ ءتوندىرۋ ارەكەتىمەن تەڭەستىرۋ, سونداي-اق مەديكتەرگە سمارت-بەينەجەتوندار بەرۋ, اۋرۋحانالاردا كەشەندى كۇزەت جۇيەلەرىن ەنگىزۋ, قابىلداۋ بولىمشەلەرىندە تاۋلىك بويعى پوليتسيا بەكەتتەرىن ورنالاستىرۋدى كوزدەيتىن بىرقاتار زاڭنامالىق تۇزەتۋلەردى دايىنداۋ باستالعان.

ولجاس بەكتەنوۆ مەديتسينا قىز­مەتكەرلەرىنىڭ قاۋىپسىزدىگىن قامتا­ماسىز ەتۋدىڭ ماڭىزدىلىعىنا نازار اۋداردى.

«مەملەكەت باسشىسىنىڭ تاپسىر­ماسىنىڭ ورىندالۋىن قامتا­ماسىز ەتۋ قاجەت. دارىگەرلەرگە شابۋىل جاسالعان مۇنداي وقيعالار قۇقىق­تىق ادىستەرمەن قاتاڭ تۇردە توقتا­تىلۋى كەرەك. وسىعان بايلانىستى دەنساۋلىق ساقتاۋ, ىشكى ىستەر, ادىلەت مينيستر­لىكتەرىنە ون كۇن مەرزىم ىشىندە قىزمەتتىك مىندەتتەرىن اتقارۋ كەزىندە مەديتسينا قىزمەتكەرلەرىنە قاتىستى زورلىق-زومبىلىق جاسالعانى ءۇشىن قىلمىستىق جازا قاراستىرۋ بويىنشا زاڭنامالىق تۇزەتۋلەر ازىرلەپ, ەنگىزۋدى تاپسىرامىن»,  دەدى پرەمەر-مينيستر.

ىشكى ىستەر ءمينيسترىنىڭ مالىمەتىنشە, اۋرۋحانالار مەن پەريناتالدىق ورتالىق­تاردىڭ قابىلداۋ بولمەلەرىندە تاۋلىك بويعى پوليتسيا بەكەتتەرى قويىلعان. بارلىعى 115 دەنساۋلىق ساقتاۋ نىسانى قورعاۋعا الىندى. كيكىلجىڭدەرگە جەدەل دەن قويۋ ماقساتىندا مارشرۋتتىق پاترۋلدەر كورسەتىلگەن مەكەمەلەرگە جاقىن ورنالاس­تىرىلدى. قازىرگى ۋاقىتتا مەديتسينالىق مەكەمەلەردە قاۋىپسىزدىكتى قامتاماسىز ەتۋ بويىنشا جەكەلەگەن شارالار قابىلداندى.

بۇدان بولەك, حالىق اراسىندا پروفي­لاكتيكالىق ءارى ءتۇسىندىرۋ جۇمىستارىن كۇشەيتۋ تاپسىرىلدى.