ارقالىق قالاسىنداعى وبلىستىق «دالا ولكەسى تاريحى» مۋزەيىنىڭ قىزمەتكەرلەرى الاش ارىسى مىرجاقىپ دۋلات ۇلىنىڭ 140 جىلدىعىنا ارنالعان «ويان, قازاق» ىزىمەن…» اتتى جولساپارعا شىقتى, دەپ جازادى Egemen.kz.
ەكسپەديتسياعا قاتىسۋشىلار جولاي امانكەلدى اۋدانىننا قاراستى تاستى اۋىلىنىڭ ماڭىنداعى كەيكى كوكەمباي ۇلىنىڭ كەسەنەسىنە ايالداپ, باتىردىڭ رۋحىنا دۇعا باعىشتادى.
ودان ءارى امانكەلدى كەنتىندەگى ا. يمانوۆ اتىنداعى مەموريالدىق مۋزەيگە سوقتى. ۇرپەك اۋىلىنا بارىپ, الەمگە ايگىلى تورعاي گەوگليفتەرىنىڭ تىلسىم سىرىنا ءۇڭىلدى.
ەكسپەديتسيا مۇشەلەرىنىڭ ايتۋىنشا, ساپاردىڭ باستى ماقساتى – مىرجاقىپ دۋلات ۇلىنىڭ كىندىك قانى تامعان قىزبەل وڭىرىندەگى اسقار كۇزدىگىنە, الاش ارداقتىسىنىڭ بيدايىقتاعى كەسەنەسىنە بارىپ زيارات ەتۋ.
ء«بىز بۇل ساپاردى كوپتەن كۇتىپ جۇرگەن ەدىك. جوسپار قۇرىلعان كۇننەن باستاپ جۇرەكتە ءبىر تولقۋ, ەرەكشە تەبىرەنىس بولدى. ويتكەنى, بۇل — كيەلى تورعايدىڭ تەرەڭ تاريحىنا تاعزىم جاساۋ, ۇلت زيالىلارىنىڭ ءىزى قالعان قاسيەتتى مەكەنمەن سىرلاسۋ بولاتىن», دەيدى «دالا ولكەسى تاريحى» مۋزەيىنىڭ باسشىسى راۋان تەرەك.
تاعىلىمدى ساپارعا جەرگىلىكتى كاسىپكەر ەردەن سوتسيال ۇلى, ارقالىق قازاق جاسوسپىرىمدەر تەاترىنىڭ باسشىسى نۇرلىبەك ساپابەك ۇلى سياقتى ازاماتتار دەمەۋشىلىك جاساعان.
ەكسپەديتسيا ەندى تورعايعا بارىپ توقتاپ, ىبىراي التىنسارين, نۇرحان احمەتبەكوۆ, شاقشاق جانىبەك, ءالىبي جانكەلدين, احمەت بايتۇرسىن ۇلى مەن مىرجاقىپ دۋلات ۇلى سىندى زاڭعار تۇلعالاردىڭ مۋزەيلەرىن ارالايدى.
قوستاناي وبلىسى