Galt & Taggart ينۆەستيتسيالىق كومپانياسىنىڭ دەرەگىنشە, 2025 جىلدىڭ العاشقى التى ايىندا گرۋزيانىڭ حالىقارالىق تۋريزمنەن تۇسكەن تابىسى 2 ميلليارد اقش دوللارىنا جەتىپ, 2024 جىلدىڭ سايكەس كەزەڭىمەن سالىستىرعاندا 6,2 پايىزعا ارتتى. بۇل ەل تاريحىنداعى ەڭ جوعارى كورسەتكىش رەتىندە تىركەلدى, دەپ حابارلايدى Egemen.kz Business Media-عا سىلتەمە جاساپ.
تۋريزمنەن تۇسكەن تابىستىڭ باسىم بولىگى ەكىنشى توقسانعا تيەسىلى – 1,2 ميلليارد دوللار. بۇل وتكەن جىلدىڭ سايكەس كەزەڭىمەن سالىستىرعاندا 9,1 پايىزعا ارتىق. ساراپشىلاردىڭ بولجامىنشا, جىل سوڭىنا دەيىن ەلدىڭ تۋريزم كىرىسى 4,5 ميلليارد دوللارعا جەتۋى مۇمكىن.
رەسمي ستاتيستيكاعا سايكەس, ەكىنشى توقساندا گرۋزياعا 1,6 ميلليون شەتەلدىك كەلۋشى بارعان. بۇل وتكەن جىلمەن سالىستىرعاندا 7 پايىزعا كوپ. ولاردىڭ 80,1 پايىزى ەلدە تۇنەگەن, ال ءبىر كۇندىك ساپارمەن كەلگەندەر سانى 5,4 پايىزعا ازايعان.
تۋريستىك اعىننىڭ ارتۋىنا رەسەي (+16,0%), ەۋروپالىق وداق ەلدەرى (+20,5%), ارمەنيا (+7,2%) جانە ءۇندىستان (+33,5%) ساياحاتشىلارى ەلەۋلى ۇلەس قوسقان. سونىمەن قاتار, ازەربايجاننان كەلەتىن تۋريستەر سانى دا 46,7 پايىزعا ءوسىپ وتىر, قۇرلىق شەكاراسى جابىق بولعانىنا قاراماستان.
ال تۇركيا مەن يراننان كەلەتىن تۋريستەر سانى سايكەسىنشە 16,5% جانە 8,2% تومەندەگەن.
ايتا كەتەيىك, 2025 جىلدىڭ العاشقى توقسانىندا قازاقستان تۋريست جىبەرۋشى العاشقى ون ەلدىڭ قاتارىنا ەنگەن.