قازاقستان رەسپۋبليكاسى پاسپورتىنىڭ جاڭا ۇلگىسىندە قار بارىسىنىڭ بەينەسى پايدا بولادى. بۇل تۋرالى ۇكىمەت وتىرىسىندا ىشكى ىستەر ءمينيسترىنىڭ ءبىرىنشى ورىنباسارى, مينيستر مىندەتىن اتقارۋشى باۋىرجان الەنوۆ مالىمدەدى, دەپ جازادى Egemen.kz.
باۋىرجان الەنوۆتىڭ ايتۋىنشا, ىشكى ىستەر مينيسترلىگى ۇلتتىق پاسپورتتىڭ قورعالۋ دەڭگەيىن ارتتىرۋ باعىتىندا جۇمىس جۇرگىزىپ جاتىر.
«بۇگىندە قازاقستان ازاماتتارى 43 ەلگە ۆيزاسىز بارا الادى. ءبىزدىڭ پاسپورت بارلىق حالىقارالىق ستاندارتتارعا سايكەس كەلەدى جانە قاجەتتى قورعانىس ەلەمەنتتەرىمەن جابدىقتالعان. قازىر قوسىمشا قورعانىس دەڭگەيلەرىن ەنگىزۋ ماسەلەسى قاراستىرىلىپ جاتىر», دەدى ول.
مينيستر مىندەتىن اتقارۋشىنىڭ بايانداماسى كەزىندە جاڭا پاسپورتتىڭ بەينەسى كورسەتىلگەن پرەزەنتاتسيا ۇسىنىلدى. وندا ءجيى مەملەكەتتىك رامىزدەردە, سپورت كلۋبتارىنىڭ ەمبلەمالارىندا جانە ءتۇرلى ۇيىمداردىڭ لوگوتيپتەرىندە بەينەلەنەتىن قار بارىسىنىڭ سۋرەتى كورىنىس تاپقان.