الماتىلىق سۇلتان ەلەمەسوۆ 15 جىلدان بەرى كولىكتەن سانالى تۇردە باس تارتقان. قالا تىرلىگىندە جەكە كولىكسىز ءجۇرۋ كوپشىلىككە جات كورىنگەنمەن, ول بۇل شەشىمىنىڭ شاپاعاتىن از ۋاقىتتا تانىپتى.
ونىڭ پايىمىنشا, تەمىر تۇلپارعا قارجى شاشقانشا, سول قاراجاتتى دۇرىس باعىتقا بۇرعان ءجون. بوسقا كەتەتىن شىعىننىڭ ورنىن دەپوزيتپەن, جىلجىمايتىن م ۇلىكپەن تولتىرۋ كەرەك دەگەن كوزقاراستا.
سۇلتان ەلەمەسوۆ – بىلىكتى اۋديتور, كاسىبي بۋحگالتەر, قارجى سالاسىندا ون بەس جىلدان اسا تەر توگىپ جۇرگەن ازامات. بىرقاتار ەكىنشى دەڭگەيلى بانك پەن ولاردىڭ ەنشىلەس كومپانياسىندا قىزمەت ىستەگەن. ءوز تاجىريبەسى تۋرالى ايتاردا ول كوپشىلىك ءجيى مىنەتىن «Hyundai Tucson» مودەلىن مىسال ەتەدى. باعاسىن, امورتيزاتسياسىن, تەحنيكالىق قىزمەتىن, ساقتاندىرۋىن تۇگەل سارالاپ, ەسەپ جۇرگىزگەن. كولىككە قۇيىلاتىن قارجى مەن سول قارجىنى دەپوزيتكە سالىپ, تاكسي مەن قوعامدىق كولىكتى قاتار قولدانۋدىڭ تيىمدىلىگىن تارازىلايدى. ەلەمەسوۆ جۇرگىزگەن ەسەپكە سۇيەنسەك, كولىك يەلەنۋ مەن ودان باس تارتىپ, اقشانى ءتيىمدى ينۆەستيتسيالاۋ اراسىندا ايتارلىقتاي ايىرما بار.
– ەگەر كولىكتى نەسيەگە الساق, العاشقى جىلى كەمىندە 6 ملن تەڭگە كەتەدى: 1,7 ملن تەڭگە – باستاپقى جارنا, 3 ملن تەڭگەگە جۋىق – نەسيە تولەمى جانە قوسىمشا شىعىندارعا (تەحقىزمەت, جانارماي, تۇراق) 1,3 ملن تەڭگە جۇمسالادى. كەلەسى جىلدارى بۇل سوما جىلىنا 4,5 ملن تەڭگە دەڭگەيىندە ساقتالادى. ال كولىكتى ساتىپ الىپ, ۇستاۋ شىعىنىن تىكەلەي ەسەپتەسەك, كولىك قۇنى – 17 ملن تەڭگە, قىزمەت ەتۋ مەرزىمى 20 جىل دەپ الايىق. وسى نەگىزدە امورتيزاتسيا جىلىنا 850 مىڭ تەڭگەنى قۇرايدى. جىلدىق باسقا شىعىندارعا تەحنيكالىق قىزمەت (120 مىڭ تەڭگە), جانارماي (400 مىڭ تەڭگە), ساقتاندىرۋ مەن سالىق (250 مىڭ تەڭگە), اۆتوتۇراق (250 مىڭ تەڭگە), شينا, جۋ, ۇساق جوندەۋ (150 مىڭ تەڭگە) كىرەدى. بارلىق شىعىن جىلىنا شامامەن 2 ملن-نان اسادى. ياعني ايىنا – 168 مىڭ تەڭگە. بۇعان قوسا, اۆتونەسيە العان جاعدايدا تولەنەتىن پايىزدار مەن ۋاقىت, كۇيزەلىس, كۇتپەگەن جاعدايلاردى دا ەسەپكە الا بەرىڭىز, – دەيدى ول.
ونىڭ ايتۋىنشا, كولىك الاتىن اقشاڭىز بولسا, ماسەلەن, 17 ملن تەڭگەنى دەپوزيتكە سالىپ قويساڭىز, جىل سوڭىندا 3 ملن-عا جۋىق تابىس تاباسىز.
– مىسالى, مەن تاكسي قىزمەتى مەن قوعامدىق كولىكتەردى پايدالانامىن. ءسىز كولىك ساتىپ الماعان جاعدايدا تەك ماتەريالدىق ەمەس, مورالدىق تا جەڭىلدىك الاسىز: كەپتەلىس, جوندەۋ, ايىپپۇل, سالىق سىندى اۋرە-سارساڭنان بوسايسىز. ءتىپتى بەلسەندى قوزعالىس كەزىندە دە شىعىن جىلىنا 1,15 ملن تەڭگەدەن اسپايدى, ال كولىك ۇستاۋ شىعىنى بۇدان 3 ەسە جوعارى. ەگەر كولىك الاتىن اقشاڭىزدى 15,5% مولشەرلەمەمەن دەپوزيتكە سالىپ, سول اقشاعا تاكسي مەن اۆتوبۋس ۇيلەستىرىپ جۇرسەڭىز, بۇل قارجىلىق تۇرعىدان الدەقايدا ۇتىمدى, – دەيدى قارجىگەر.