وسى جىلى ەلىمىزدە قانشا ءۇي سالىندى؟

ەلدەگى تۇرعىن ءۇيدىڭ باسىم بولىگىن شامامەن 93 پايىزىن جەكە قۇرىلىس كومپانيالارى سالعان. نارىقتاعى باسەكەنىڭ كوپ بولىگى جەكەمەنشىك سەكتوردىڭ يەلىگىندە بولىپ تۇر. جالپى التى اي ىشىندە 807 كوپقاباتتى ءۇي, 14 844 جەكە تۇرعىن ءۇي مەن 22 جاتاقحانا بوي كوتەرىپ, 72 مىڭنان استام جاڭا پاتەر ەل يگىلىگىنە بەرىلدى.

الماتى قالاسى تۇرعىن ءۇي كەشەندەرىنىڭ سانى بويىنشا كوش باستاپ تۇر. جارتى جىلدا مۇندا 242 جاڭا نىسان سالىنسا, استانادا 77, الماتى وبلىسىندا 61 ءۇي تۇرعىزىلعان. الايدا جاڭا پاتەر سانى جاعىنان استانا الدا: ەلوردادا 19,1 مىڭ پاتەر بەرىلسە, الماتىدا بۇل كورسەتكىش 14,8 مىڭ. مۇنداي ايىرماشىلىقتى ماماندار الماتىداعى قۇرىلىس بيىكتىگىنە قويىلعان شەكتەۋلەرمەن بايلانىستىرادى.

جەكە تۇرعىن ۇيلەر بويىنشا الماتى وبلىسى ايقىن باسىمدىققا يە: مۇندا جىل باسىنان بەرى 2,4 مىڭنان استام جەكە ءۇي سالىنعان. ال كوپقاباتتى ءۇي سانى از وڭىرلەردىڭ قاتارىندا اتىراۋ, شىعىس قازاقستان جانە ماڭعىستاۋ وبلىستارى بار — بۇل ايماقتاردا 10–13 ءۇي عانا تۇرعىزىلعان.

قۇرىلىس قارقىنى ءار وڭىردە ءارتۇرلى. تۇركىستان, اقمولا وبلىستارى مەن شىمكەنتتە ءوسىم بايقالسا (تيىسىنشە +18,2 %, +15 % جانە +14,5 %), قاراعاندى مەن اباي وبلىستارىندا كەرىسىنشە, تومەندەۋ تىركەلگەن, 11-12 پايىزعا دەيىن.

ايتا كەتەرلىگى, تۇرعىن ءۇي قۇرىلىسىنا سالىقتىڭ اسەرى دە وزەكتى ماسەلەلەردىڭ ءبىرى. قوسىلعان قۇن سالىعىنىڭ (ققس) كوتەرىلۋى قۇرىلىس ماتەريالدارىنىڭ وزىندىك قۇنىنا اسەر ەتۋى مۇمكىن. الايدا پرەمەر-مينيستر ولجاس بەكتەنوۆ سالىق كودەكسىندەگى وزگەرىستەر باعانىڭ كۇرت وسۋىنە اكەلمەيدى دەپ مالىمدەدى. دەگەنمەن, نارىقتاعى جاعداي, قۇرىلىس لوگيستيكاسى مەن ينفراقۇرىلىمدىق شىعىندار باعاعا ءوز اسەرىن تيگىزەتىنىن ەسكەرگەن ءجون.

جالپى العاندا, 2025 جىلدىڭ العاشقى التى ايىنداعى كورسەتكىشتەر قۇرىلىس سەكتورىنىڭ وڭ سەرپىنگە يە ەكەنىن بايقاتادى. الايدا وڭىرلەر اراسىنداعى تەڭسىزدىك, تۇرعىن ءۇي باعاسىنىڭ ءوسۋ قاۋپى جانە ينفراقۇرىلىمعا قاتىستى تۇيتكىلدەر سالادا شەشىمىن كۇتكەن ماسەلەلەر رەتىندە قالا بەرمەك.