پرەزيدەنتتىڭ تاپسىرمالارىن ورىنداۋ اياسىندا ۇكىمەت ەلدىڭ ترانزيتتىك الەۋەتىن نىعايتۋ باعىتىندا جۇيەلى جۇمىستار جۇرگىزىپ جاتىر. بۇل – قازاقستاننىڭ شىعىس پەن باتىس, سونداي-اق ورتالىق ازيا مەن وڭتۇستىك ازيا اراسىنداعى نەگىزگى لوگيستيكالىق حاب رەتىندەگى مارتەبەسىن بەكەمدەۋگە باعىتتالعان ستراتەگيالىق ماڭىزدى قادام, دەپ جازادى Egemen.kz.
پرەمەر-ءمينيستردىڭ ايتۋىنشا, قازىرگى ۋاقىتتا قازاقستان تەمىرجولدارىنىڭ وتكىزۋ قابىلەتى شەگىنە جەتكەن. سوڭعى 5 جىل ىشىندە ترانزيت كولەمى جالپى العاندا 50%-عا ارتقان, ال ترانسكاسپي باعىتى بويىنشا 6 ەسە كوبەيگەن. تەك وتكەن جىلدىڭ وزىندە قىتايدان ەۋروپاعا جەتكىزۋ كولەمى 62%-عا ءوسىپ, 4,5 ميلليون تونناعا جەتتى. قازىر مەملەكەت باسشىسىنىڭ تاپسىرماسى بويىنشا قىتايمەن شەكاراداعى وتكىزۋ مۇمكىندىكتەرىن كەڭەيتۋگە باعىتتالعان اۋقىمدى جۇمىس جۇرگىزىلىپ جاتىر.
«بيىل دوستىق-مويىنتى تەمىرجول جەلىسىنىڭ ەكىنشى جولدارىن, الماتى اينالما جولىن پايدالانۋعا بەرەمىز. كەلەسى جىلى داربازا-ماقتارال باعىتىن دامىتامىز. مويىنتى-قىزىلجار, باقتى-اياگوز – وسى جوبالاردىڭ بارلىعى الداعى ۋاقىتتا ەلىمىزدىڭ وتكىزۋ قابىلەتىن 10 ميلليون تونناعا دەيىن ارتتىرۋعا مۇمكىندىك بەرەدى. بۇل – ۇلكەن ينۆەستيتسيانى قاجەت ەتەتىن اۋقىمدى جۇمىس, بىراق ءبىز بۇعان بارامىز. سەبەبى, بىزدە بار باسەكەلىك ارتىقشىلىقتى جوعالتىپ الماۋىمىز كەرەك», دەدى پرەمەر-مينيستر.
سونداي-اق, كولىك پروتسەستەرىن تسيفرلاندىرۋعا ەرەكشە نازار اۋدارىلىپ وتىر. TEZ Customs پلاتفورماسى نەگىزىندە تسيفرلىق ساۋدا ءدالىزىن ەنگىزۋ ترانزيتتىك دەكلاراتسيالاردى اۆتوماتتى تۇردە تىركەۋ جانە راسىمدەۋ ۋاقىتىن 3 ساعاتتان 30 مينۋتقا دەيىن قىسقارتادى. بۇل ترانزيتتىك اعىنداردىڭ جەدەلدىگى مەن تيىمدىلىگىنە وڭ اسەرىن تيگىزىپ وتىر.