مەملەكەت باسشىسى سۋ شارۋاشىلىعى سالاسىن جاڭا, بىلىكتى كادرلارمەن قامتاماسىز ەتۋ جونىندە ناقتى مىندەت قويعانى ءمالىم. گرانتتار سانىنىڭ ارتۋى – وسى باعىتتاعى ماڭىزدى قادام. ءبىر جىل بۇرىن جوعارى وقۋ ورىندارىندا سۋ شارۋاشىلىعى ماماندىقتارىنا 618 گرانت بولىنسە, 2025-2026 وقۋ جىلىنا گيدروگەولوگيا جانە گيدرولوگيا سياقتى پانارالىق ماماندىقتاردى ەسەپتەمەگەندە بارلىعى 1052 گرانت ءبولىنىپ وتىر, دەپ جازادى Egemen.kz.
سۋ ماماندارىنىڭ دايارلايتىن جوو سانى دا ارتىپ كەلەدى. جاڭا وقۋ جىلىنان باستاپ جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى العاش رەت «گيدرومەليوراتسيا» ماماندىعى بويىنشا ستۋدەنتتەردى قابىلداۋدى جوسپارلاپ وتىر.
بىلتىر وندىرىستىك تاجىريبەدەن وتكەن ستۋدەنتتەر سانى 82 بولسا, بيىل بۇل كورسەتكىش 339-عا جەتكەن, ياعني, ءتورت ەسە ارتقان.
سۋ رەسۋرستارى جانە يرريگاتسيا مينيسترلىگىنە قاراستى عىلىم جانە يننوۆاتسيالار دەپارتامەنتىنىڭ ديرەكتورى لاززات ءجۇسىپوۆانىڭ ايتۋىنشا, سالا مينيسترلىگى سۋ شارۋاشىلىعى ماماندىقتارىنا دەگەن قىزىعۋشىلىقتى ارتتىرۋ بويىنشا بىرقاتار شارانى ازىرلەپ, ىسكە اسىرىپ جاتىر. ولاردىڭ قاتارىندا ەڭبەكاقىنى كوتەرۋ ماسەلەسى دە بار.