ءسۇيىنشى جاڭالىقتى مادەنيەت جانە اقپارات مينيسترلىگى حابارلادى. 10–13 شىلدە ارالىعىندا بەلارۋس رەسپۋبليكاسىندا «ۆيتەبسكىدەگى سلاۆيان بازارى» XXXIV حالىقارالىق ونەر فەستيۆالىندە ەل نامىسىن الماگۇل باتتاليەۆا قورعادى, دەپ جازادى Egemen.kz.
جەتىسۋ وبلىستىق دانەش راقىشەۆ اتىنداعى فيلارمونياسىنىڭ ءانشىسى فينالدا «ۆەچنوست» كومپوزيتسياسىن ورىندادى.
وتانداسىمىز ونەرىمەن كوپشىلىكتىڭ كوڭىلىنەن شىعىپ, قازىلار القاسىنىڭ دا جوعارى باعاسىنا يە بولدى. الماگۇل باتتاليەۆا ەكى بايقاۋ كۇنىنىڭ قورىتىندىسى بويىنشا 137 ۇپاي جيناپ, فەستيۆالدىڭ گران-پري جۇلدەسىن جەڭىپ الدى.
الماگۇل باتتاليەۆا – الماتى قالاسىنىڭ تۋماسى, دارىندى جاس ءانشى. ەرتە جاستان ۆوكالدىق قابىلەتى انىق بايقالعان. 14 جاسىندا پ. ي. چايكوۆسكي اتىنداعى الماتى مۋزىكالىق كوللەدجىنە وقۋعا تۇسكەن. سونىمەن قاتار الماگۇل بىرنەشە اسپاپتى اككوردەون, فورتەپيانو جانە ۋكۋلەلەنى ەركىن مەڭگەرگەن.ول «جاس قانات – 2023» فەستيۆالى, «الماتىم جۇرەگىمدە» حالىقارالىق بايقاۋى سىندى بەدەلدى مۋزىكالىق جارىستاردا جوعارى دەڭگەيدە ونەر كورسەتىپ, كاسىبي شەبەرلىگىن بىرنەشە مارتە دالەلدەگەن.مادەنيەت جانە اقپارات مينيسترلىگى الماگۇل باتتاليەۆانى «سلاۆيان بازارى» فەستيۆالىندەگى جارقىن جەڭىسىمەن قۇتتىقتاپ, بۇل جەتىستىك ونىڭ ونەر جولىنداعى ىزدەنىسى مەن دارىنىنىڭ ايقىن كورىنىسى ەكەنىن اتاپ ءوتتى.