شىمكەنت قالاسىنىڭ توتەنشە جاعدايلار قىزمەتى جاڭا كولىكتەرمەن تولىقتى. ءورت ءسوندىرۋ مەن قۇتقارۋ تەحنيكالارى تجد ماتەريالدىق-تەحنيكالىق بازاسىن نىعايتۋ باعدارلاماسى اياسىندا جەتكىزىلدى. كولىكپەن بىرگە تجد 25 قىزمەتكەرىنە جەرگىلىكتى «قامقور» باعدارلاماسى ارقىلى يپوتەكالىق پاتەر كىلتتەرى مەن ارنايى كيىمدەر تاپسىرىلدى, دەپ حابارلايدى Egemen.kz.
سالتاناتتى ءىس-شاراعا قازاقستان رەسپۋبليكاسىنىڭ توتەنشە جاعدايلار ءمينيسترى گەنەرال-مايور شىڭعىس ءارىنوۆ, قالا اكىمى عابيت سىزدىقبەكوۆ تجد باسشىلىعى مەن جەكە قۇرامى قاتىستى. ايتا كەتەيىك, جاڭا تەحنيكالار قالالىق اكىمدىكتىڭ قولداۋىمەن ساتىپ الىنعان.
مەگاپوليس باسشىسى جاڭا تەحنيكالار مينيسترلىك پەن قالالىق اكىمدىكتىڭ قولداۋىمەن ساتىپ الىنعانىن جەتكىزدى. سونىمەن بىرگە توتەنشە جاعدايلار قىزمەتىنە قامقورلىق جاساۋ ازاماتتىق قورعانىس جۇيەسىن كۇشەيتۋگە, قۇتقارۋشىلاردىڭ الەۋمەتتىك جاعدايىنىڭ جاقسارۋىنا ىقپال ەتەتىنىن مالىمدەدى.
«توتەنشە جاعدايلار قىزمەتىنىڭ ماتەريالدىق-تەحنيكالىق بازاسىن نىعايتۋ مەملەكەت باسشىسى قاسىم-جومارت توقاەۆتىڭ تاپسىرماسى اياسىندا ىسكە اسىرىلىپ وتىر. وسىعان وراي قالا اكىمدىگى الداعى ۋاقىتتا دا ءتيىستى مينيسترلىكپەن بىرگە ازاماتتىق قورعاۋ جۇيەسىن كۇشەيتۋدى جالعاستىرا بەرەدى. سونداي-اق ادام ءومىرى مەن قاۋىپسىزدىگى ءۇشىن كۇرەسەتىن قىزمەت وكىلدەرىن تەحنيكالىق جاراقتاندىرۋ مەن الەۋمەتتىك قولداۋ دا جەرگىلىكتى اتقارۋشى بيلىكتىڭ ءاردايىم نازارىندا تۇرادى» دەدى قالا اكىمى.
شاھار باسشىسىنىڭ ايتۋىنشا, تجد-نى ماتەريالدىق تۇرعىدان دامىتۋ مەگاپوليستە تۇراقتى جۇزەگە اسىرىلىپ كەلەدى. سونىڭ ءبىر ايعاعى جۋىردا قالادان اشىلعان جاڭا ءورت ءسوندىرۋ دەپولارى.
سونىمەن سالتاناتتى ءىس-شارا بارىسىندا قۇتقارۋ بولىمشەلەرىنە اۆتوتسيستەرنالار, سورعى-جەڭدى اۆتوموبيلدەر, اۆتوكراندار, اۆاريالىق-قۇتقارۋ اۆتوموبيلدەرى جانە كوبىكتى ءسوندىرۋ تەحنيكاسىن قوسا العاندا 40 دانا زاماناۋي تەحنيكا تۇرلەرى تاپسىرىلدى. بۇل ماتەريالدىق-تەحنيكالىق بازانى جاقسارتۋمەن بىرگە قۇتقارۋشى جاساقتاردىڭ توتەنشە جاعدايلارعا دايىندىعىن ارتتىرا تۇسپەك.
شىمكەنت