قازاق ۇلتتىق اگرارلىق زەرتتەۋ ۋنيۆەرسيتەتىنىڭ بازاسىندا جىبەك جولى ەلدەرىنىڭ اگرارلىق ءبىلىم جانە عىلىم سالاسىنداعى يننوۆاتسيالار اليانسىنىڭ قۇرىلعانىنا 10 جىل تولۋىنا وراي, ءداستۇرلى X جينالىسى جانە شىۇ مەملەكەتتەرىنىڭ اۋىل شارۋاشىلىعى ۋنيۆەرسيتەتتەرى رەكتورلارىنىڭ IV فورۋمى ءوتتى.
ءىس-شاراعا اليانس قۇرامىنداعى 19 ەلدىڭ 120-دان استام جوعارى وقۋ ورىندارى مەن عىلىمي مەكەمەلەردەن 200-دەن استام دەلەگات قاتىستى.
جىبەك جولى ەلدەرىنىڭ اگرارلىق ءبىلىم بەرۋ جانە عىلىم سالاسىنداعى يننوۆاتسيالار اليانسى 2016 جىلى قىتايدىڭ سولتۇستىك-باتىس اۋىل شارۋاشىلىعى جانە ورمان شارۋاشىلىعى ۋنيۆەرسيتەتى باستاماسىمەن قۇرىلعان بولاتىن. وسى كەزەڭدە اليانس حالىقارالىق جوعارى وقۋ ورىندارىنىڭ بىلىكتى كادرلار دايارلاۋ سالاسىنداعى كۇش-جىگەرىن بىرىكتىرۋ, بىرلەسكەن ءبىلىم باعدارلامالارىن, عىلىمي زەرتتەۋلەر مەن اگروتەحنولوگيالار ترانسفەرىن دامىتۋعا كۇش سالىپ كەلەدى.
جۇمىسى 2022 جىلى باستالعان شىۇ رەكتورلار فورۋمى بۇگىندە تۇراقتى اۋىل شارۋاشىلىعى, ازىق-ت ۇلىك قاۋىپسىزدىگى جانە سالانى تسيفرلاندىرۋ ماسەلەلەرى بويىنشا اگرارلىق ۋنيۆەرسيتەتتەر اراسىنداعى اشىق ديالوگ فورماتىنداعى ماڭىزدى پلاتفورماعا اينالدى.
«جىبەك جولىنداعى اگرارلىق ءبىلىم جانە عىلىم سالاسىنداعى ىنتىماقتاستىقتى تەرەڭدەتۋ – بولاشاقتىڭ اۋىل شارۋاشىلىعىن دامىتۋعا جاردەمدەسۋ» تاقىرىبىندا وتكەن فورۋمدا KazNARU باسقارما توراعاسى-رەكتور اقىلبەك كۇرىشباەۆ اگرارلىق عىلىمدى ىلگەرىلەتۋ جانە ءوڭىردى ورنىقتى دامىتۋ ءۇشىن وتە ماڭىزدى الاڭ ەكەنىن اتاپ ءوتتى.
«بيىلعى جىلى ءبىزدىڭ ۋنيۆەرسيتەتىمىزدىڭ وسىنداي اۋقىمدى حالىقارالىق شارانىڭ تەڭ ۇيىمداستىرۋشىسى اتانۋى – ەرەكشە رامىزدىك مانگە يە. بۇل ۋنيۆەرسيتەتتىڭ اكادەميالىق ورتادا تانىلۋى عانا ەمەس, سونىمەن قاتار ايماقتاعى ەلدەر اراسىنداعى عىلىم, ءبىلىم جانە يننوۆاتسيا سالاسىنداعى ينتەگراتسيانى تەرەڭدەتۋدەگى بەلسەندىلىگىنىڭ ەسەلەپ وسكەنىن ايعاقتايدى. مەملەكەت باسشىسى قاسىم-جومارت توقاەۆتىڭ جۋىردا وتكەن «ورتالىق ازيا – قىتاي» سامميتىندە كەلەسى جىلدى «عىلىم مەن ءبىلىم جىلى» دەپ جاريالاعان تاريحي باستاماسى بۇگىنگى جينالىسىمىزدىڭ وزەكتىلىگى مەن ماڭىزدىلىعىن ارتتىرا تۇسپەك. بۇل شەشىم – ءبىلىم مەن عىلىمنىڭ, تەحنولوگيا مەن اكادەميالىق ارىپتەستىكتىڭ ايماقتىق دامۋدىڭ قوزعاۋشى كۇشى رەتىندەگى قۋاتتى ءرولىن تاعى دا ايعاقتايدى. وسى يگى باستامادا كورىنىس تاپقان يدەيالار – ءبىزدىڭ اليانسىمىزدىڭ ميسسياسى مەن مىندەتتەرىمەن تەرەڭ ۇندەسەدى. بۇگىنگى تاڭدا اۋىل شارۋاشىلىعى اسا كۇردەلى كەزەڭ مەن قارقىندى وزگەرىستەردى باستان كەشىرۋدە. ول ەكونوميكانىڭ جاي عانا ءبىر سالاسى رەتىندە عانا ەمەس, ادامزاتتىڭ تۇراقتى دامۋى مەن وركەندەۋىنىڭ, حالىقتىڭ ءال-اۋقاتى مەن پلانەتانىڭ ەكولوگيالىق تەپە-تەڭدىگى تاۋەلدى بولاتىن جۇيە قۇراۋشى سالا رەتىندە ءجيى قاراستىرىلۋدا», دەپ اتاپ ءوتتى ا.كۇرىشباەۆ.
فورۋمنىڭ پلەنارلىق وتىرىسىندا جىبەك جولى ەلدەرىنىڭ اگرارلىق ءبىلىم جانە عىلىم سالاسىنداعى يننوۆاتسيالار اليانسىنىڭ باس حاتشىسى, سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتىنىڭ رەكتورى, پروفەسسور ۆۋ پۋتە اگرارلىق جوعارى وقۋ ورىندارى ءبىلىمنىڭ عانا ەمەس, ۋاقىت تالابىنا ساي وزىق تەحنولوگيالىق شەشىمدەر ورتالىعىنا اينالعانىن اتاپ ءوتتى. جەتەكشى اگرارلىق ۋنيۆەرسيتەتتەردىڭ ميسسياسىن كەشەندى قولدانۋ – كۇش بىرىكتىرۋگە, دامۋ باعىتتارىن ءدال انىقتاۋعا جانە ترانسۇلتتىق ءوزارا ىنتىماقتاستىق ۇلگىلەرىنىڭ ءتيىمدى مودەلدەرىن قۇرۋعا نەگىز بولادى.
الماتى