«قازگيدرومەت» رمك-نىڭ اتىراۋ وبلىستىق فيليالى اۋا-رايىن بولجاۋ ءبولىمىنىڭ باسشىسى اينا قازعۇلوۆانىڭ ايتۋىنا قاراعاندا, شىلدەنىڭ ەكىنشى جانە ءۇشىنشى ونكۇندىگىندە كۇرت ىسيدى, دەپ حابارلايدى Egemen.kz.
«اتىراۋ وبلىسىندا ادەتتە ايلىق ورتاشا تەمپەراتۋرانىڭ قالىپتى كورسەتكىشى +25,6-27,9 گرادۋس ارالىعىندا بولادى. ال بيىل +26,9-دان +29,1-گە دەيىن قۇبىلادى. بۇل كورسەتكىش كوپجىلدىق ورتاشا ماننەن شامامەن +1 گرادۋسقا جوعارى بولعالى وتىر. بىراق شىلدەنىڭ ەكىنشى جانە ءۇشىنشى ونكۇندىگىندە كۇن قاتتى ىسيدى. اۋا تەمپەراتۋراسى +38°س-تان +43°س-قا دەيىن كوتەرىلەدى. وسى كۇندەرى تۇنگى اۋا تەمپەراتۋراسى +22°س پەن +27°س ارالىعىندا ساقتالادى», دەيدى اينا قازعۇلوۆا.
كەيىنگى بىرنەشە كۇن بويى اۋا رايىنىڭ كۇرت ىسىعانى بايقالىپ وتىر. اتىراۋ وبلىستىق دەنساۋلىق ساقتاۋ باسقارماسىنىڭ شتاتتان تىس باس تەراپەۆتى مەيىرگۇل كەنجەعاليەۆا وسىعان بايلانىستى تۇرعىندارعا, اسىرەسە, بالالارعا, قارتتار مەن سوزىلمالى اۋرۋى بار ادامدارعا بارىنشا ساق بولۋدى ەسكەرتتى.
«اۋا تەمپەراتۋراسىنىڭ جوعارىلاۋى اعزانىڭ تەز شارشاۋىنا, قان قىسىمىنىڭ كوتەرىلۋىنە, جۇرەك-قان تامىرلارى جۇمىسىنىڭ السىرەۋىنە اكەلىپ سوقتىرۋى مۇمكىن. وسى كەزەڭدە مۇمكىندىگىنشە كولەڭكەدە ءجۇرۋ, باس كيىم كيىپ, سۇيىقتىقتى كوپ مولشەردە تۇتىنعان ءجون. كۇننىڭ ەڭ قىزاتىن ۋاقىتى – ساعات 11:00 مەن 17:00 ارالىعىندا دالادا ۇزاق جۇرمەۋ كەرەك», دەيدى مەيىرگۇل كەنجەعاليەۆا.