ماڭعىستاۋ وبلىسىندا 250-گە جۋىق دارىگەر جەتىسپەيدى. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى بەكبولات ءىزباساروۆ مالىمدەدى, دەپ حابارلايدى Egemen.kz.
ونىڭ ايتۋىنشا, وڭىرگە تەراپەۆت, پەدياتر, حيرۋرگ, اكۋشەر-گينەكولوگ, انەستەزيولوگ جانە گەماتولوگ ماماندار قاجەت.
«ماسەلەنى شەشۋ ءۇشىن بىلتىردان باستاپ كوتەرمە جاردەماقى مولشەرى ۇلعايتىلدى. قازىر ماڭعىستاۋ وبلىسىنا كوشىپ كەلەتىن دارىگەرلەرگە قارجىلاي قولداۋ كورسەتىلەدى. قالادا جۇمىس ىستەيتىن ماماندارعا – 3 ملن تەڭگە, اۋدانعا بارعاندارعا – 5 ملن تەڭگە, ال اۋىلعا ورنالاسقاندارعا – 8,5 ملن تەڭگە تولەنەدى», دەدى باسقارما باسشىسى.
بيىل مۇنداي قولداۋعا 60 دارىگەر يە بولعان. جىل سوڭىنا دەيىن ماماندارعا 50 پاتەر ساتىپ الۋ جوسپارلانىپ وتىر.