كونگو دەموكراتيالىق رەسپۋبليكاسىنىڭ شىعىسىنداعى ەپيدەميولوگيالىق احۋال كۇرت ناشارلادى. وڭتۇستىك كيۆۋ پروۆينتسياسىندا تىرىسقاق ىندەتى تارالىپ, تۇرعىنداردىڭ ومىرىنە ەلەۋلى قاۋىپ توندىرۋدە. جىل باسىنان بەرى بۇل جۇقپالى اۋرۋدان 28 ادام كوز جۇمعان. مامانداردىڭ ايتۋىنشا, وڭىردە 600-گە جۋىق ادام ينفەكتسيا جۇقتىرعان, دەپ جازادى Egemen.kz.
جەرگىلىكتى اۋرۋحانالار سىرقاتتارمەن لىق تولى. دەنساۋلىق ساقتاۋ جۇيەسىنىڭ مۇمكىندىگى شەكتەۋلى بولعاندىقتان, گۋمانيتارلىق كومەك كورسەتۋگە حالىقارالىق «شەكاراسىز دارىگەرلەر» ۇيىمىنىڭ ماماندارى جۇمىلدىرىلدى. الايدا ولار دا احۋالدىڭ قيىندىعىن جوققا شىعارمايدى.
ء«دارى-دارمەك تاپشىلىعى, تازا اۋىزسۋدىڭ جەتىسپەۋى جانە سانيتارلىق جاعدايدىڭ ناشارلىعى ىندەتتىڭ الدىن الۋعا جانە ەمدەۋگە ۇلكەن كەدەرگى بولىپ وتىر», دەيدى ۇيىم وكىلدەرى.
تىرىسقاق – اسا قاۋىپتى ىشەك ينفەكتسياسى. ول كوبىنە لاس سۋ نەمەسە زالالدانعان تاعام ارقىلى جۇعادى. اۋرۋ ادام اعزاسىندا سۇيىقتىقتىڭ كۇرت جوعالۋىنا سەبەپ بولادى. ەگەر دەر كەزىندە ەم قابىلدانباسا, بىرنەشە ساعات ىشىندە ولىمگە سوقتىرۋى مۇمكىن.
قازىرگى تاڭدا كونگو بيلىگى مەن حالىقارالىق ۇيىمدار ىندەتتىڭ تارالۋىن تەجەۋ ءۇشىن شۇعىل شارالار قابىلداپ جاتىر. دەگەنمەن, ايماقتاعى مەديتسينالىق ينفراقۇرىلىمنىڭ السىزدىگى, گيگيەنالىق جاعدايدىڭ تومەندىگى جانە تازا اۋىزسۋدىڭ جوقتىعى جاعدايدى كۇردەلەندىرىپ تۇر.