قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ 34-ماۋسىمى ءوز مارەسىنە جەتتى. تەاتر ماۋسىمى ءداستۇر بويىنشا مۇحتار اۋەزوۆتىڭ «اباي» قويىلىمىمەن جابىلدى. سۋرەتشى قانات ماقسۇتوۆ ساحنالىق سۇلباسىن سىزعان سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ, حورمەيستەرى – امانتاي جۇماشەۆ.
عاسىرلار بويى قالىپتاسقان كەرتارتپا ادەت-عۇرىپ پەن مىلقاۋ كۇش, دۇلەي زاماندى ايىپتاپ وتكەن اباي ويى, اباي فيلوسوفياسى جازىلعاننان بەرى ارادا قانشا جىل وتسە دە, بۇگىنگى كورەرمەن ءۇشىن دە كوكەيكەستىلىگىن جوعالتقان جوق. كەرىسىنشە ۋاقىتپەن بىرگە وزەكتىلىگىن ارتتىرىپ, زامانمەن بىرگە جاندانىپ كەلەدى. ونىڭ سىرى – مۇحتار اۋەزوۆ اباي تاقىرىبى ارقىلى كۇللى ادامزاتتىق ماسەلەلەرگە قالام تارتتى. پەسا ومىرگە كەلگەننەن بەرى تالاي مارتە ساحنا كورىپ, سونشا رەت جۇرەكتەرگە جول سالدى. ماسەلەن, رەجيسسەر الىمبەك ورازبەكوۆكە دەيىن دە اباي تاقىرىبىنا سوقپاعان ساحنا سۋرەتكەرى سيرەك. ايگىلى اسقار توقپانوۆ قولتاڭباسىنان باستاپ, ش.ايمانوۆ, ءا.مامبەتوۆ, ع.حايرۋللينا, ج.وماروۆ, ە.وباەۆ, ن.جاقىپباي, ءا.ورازبەكوۆتەن بەرى قاراي دا تىزبەكتەلىپ كەتە بەرەدى. ءبىز تاماشالاعان سپەكتاكلدە اعا اباي ءرولىن قازاقستاننىڭ حالىق ءارتىسى تىلەكتەس مەيراموۆ, اباي ءرولىن قازاقستاننىڭ ەڭبەك سىڭىرگەن قايراتكەرى نۇركەن وتەۋىل سومدادى.
جالپى, وسى ماۋسىمدا تەاتر كورەرمەن نازارىنا جەتى قويىلىمنىڭ پرەمەراسىن ۇسىنىپتى. اتاپ ايتقاندا, پ.بومارشەنىڭ «فيگارونىڭ ۇيلەنۋى» مۋزىكالىق كومەدياسى, ت.ابدىكتىڭ «پاراسات مايدانى» پسيحولوگيالىق دراماسى, «ەرتەگى ءتۇننىڭ اۋەنى» كلاسسيكالىق ەرتەگىلەر جيىنتىعى, ج.الىكەننىڭ «جۇرەك سىرى. ماحابباتىم سەن...» دراماسى, ب.برەحتتىڭ «شەڭبەر» دراماسى, ءا.كەكىلباەۆتىڭ «كۇي» دراماسى, «قۇمقالا» ەرتەگىسى ونەرسۇيەر قاۋىمنىڭ كوڭىلىنەن شىققان ەدى.
سونداي-اق تەاتر ۇجىمىنىڭ بۇل ماۋسىمداعى شىعارماشىلىق جەتىستىكتەرى دە از بولعان جوق. گ.بيۋحنەردىڭ «ۆويتسەك» دراماسى ج.ايماۋىت ۇلىنىڭ 135 جىلدىعىنا ارنالعان «ەرتىس-بايان» I رەسپۋبليكالىق تەاترلار فەستيۆالىندە جۇسىپبەك ايماۋىت ۇلى اتىنداعى ارنايى جۇلدەگە يە بولدى.
ال م.اۋەزوۆتىڭ «قاراگوز» تراگەدياسى اقتاۋ قالاسىندا وتكەن ءىىى حالىقارالىق ء«ابىش الەمى» تەاتر فەستيۆالىندە ارنايى كورسەتىلىپ, كورەرمەننىڭ زور ىقىلاسىنا بولەندى.
روزا مۇقانوۆانىڭ «بوپاي حانىم» تاريحي تراگەدياسىنداعى بوپاي حانىم ءرولى ءۇشىن قازاقستاننىڭ ەڭبەك سىڭىرگەن قايراتكەرى, اكتريسا لەيلو بەكنازار «تەاتر اLL» III حالىقارالىق تەاتر فەستيۆالىندە «ۇزدىك ايەل بەينەسى» اتالىمىنا يە بولدى. بۇدان بولەك پ.بومارشەنىڭ «فيگارونىڭ ۇيلەنۋى» مۋزىكالىق كومەدياسى قازاقستان تەاتر سىنشىلارى بىرلەستىگىنىڭ شەشىمىمەن «جىل مۋزىكالىق قويىلىمى» دەپ تانىلدى. سونداي-اق حالىقارالىق تەاتر كۇنىنە وراي ۇيىمداستىرىلعان «قاللەكي تىنىسى» سپەكتاكلدەر شەرۋىندە ساراپشىلار شەشىمى بويىنشا ۇزدىك اكتەر مەن اكتريسالار ماراپاتتالدى.
ماۋسىمنىڭ ايتۋلى جاڭالىقتارىنىڭ ءبىرى – «وقىلىم» جوباسى بولعانىن دا ايتا كەتەيىك. بۇل جوبا جاڭا پەسالار مەن تىڭ شىعارمالاردى ساحناعا شىعارۋدا ماڭىزدى ءرول اتقارىپ, كورەرمەننىڭ زور قىزىعۋشىلىعىنا يە بولدى. جوبا اياسىندا جەتى جاڭا تۋىندىنىڭ وقىلىمى ءوتتى.
تەاتردىڭ سيمفونيالىق وركەسترى مەن حالىق اسپاپتار ءانسامبلى دە كورەرمەن نازارىنا كونتسەرتتىك باعدارلامالارىن ۇسىنىپ, رەپەرتۋارداعى مۋزىكالىق قويىلىمداردى سۇيەمەلدەۋ ارقىلى كوركەمدىك دەڭگەيىنىڭ ارتۋىنا ۇلەس قوستى.
سونىمەن قاتار تەاتر ۇجىمى گاسترولدىك ساپارمەن قاراعاندى, كوكشەتاۋ, پاۆلودار, الماتى قالالارىنا باردى.
وسى ماۋسىمدا تەاتر رەپەرتۋارى بويىنشا 165 سپەكتاكل ساحنالانىپ, جالپى 42 112 كورەرمەن تاماشالادى.
كەلەسى ماۋسىمدا دا تەاتر ۇجىمى كوپشىلىككە جاڭا پرەمەرالار مەن شىعارماشىلىق جوبالاردى ۇسىنۋدى جالعاستىرادى.