بيىل Maqsut Narikbayev University-ءدى (MNU) 800-دەن استام تۇلەك ءتامامدادى. ونىڭ ىشىندە جۋرناليستيكا مەكتەبىنىڭ ستۋدەنتتەرى بار. وسىلايشا ەل جۋرناليستيكاسى تاعى ءبىر مامان لەگىمەن تولىقتى, دەپ جازادى Egemen.kz.
828 ادام MNU تۇلەگى اتاندى, ونىڭ 698-ءى باكالاۆر, 130-ى ماگيستر دارەجەسىنە يە بولدى. جاس مامانداردىڭ كوبىسى قۇقىق جوعارى مەكتەبىن (271 باكالاۆر جانە 69 ماگيستر) ءبىتىردى. ال 25 تۇلەككە «جۋرناليستيكا: اناليتيكا جانە تەرگەۋ» ماماندىعى بويىنشا ديپلوم تابىستالدى. MNU ءباسپاسوز قىزمەتىنىڭ مالىمەتىنشە بۇل ماماندىق 4 جىل بۇرىن اقپارات جانە مادەنيەت مينيسترلىگىنىڭ قولداۋىمەن اشىلعان. ودان سوڭ وقۋ ورداسى 2023 جىلى پرەزيدەنت تەلەراديوكەشەنىمەن بىرلەسىپ حالىقارالىق جۋرناليستيكا مەكتەبىن ىسكە قوسقان.
تۇلەكتەردى عىلىم جانە جوعارى ءبىلىم ءمينيسترى ساياسات نۇربەك قۇتتىقتادى.
«30 جىل ىشىندە Maqsut Narikbayev University زاڭ ءبىلىمىنىڭ التىن دىڭگەگىنە اينالدى. ءبىز مۇنى مويىندايمىز. ءبىرىنشى كەزەكتە تۇلەكتەردىڭ اتا-انالارىن قۇتتىقتايمىن جانە سىزدەرگە الاڭدايتىن ەشتەڭە جوق ەكەنىن ايتقىم كەلەدى. سەبەبى MNU بۇگىندە تۇلەكتەردى جۇمىسقا ورنالاستىرۋ كورسەتكىشى بويىنشا الدىڭعى قاتاردا تۇر. ولار ەڭ مىقتى كومپانيالاردا جۇمىس ىستەيدى, سونداي-اق ءبىز ولاردى مەملەكەتتىك قىزمەتتە كورۋگە قۋانىشتىمىز», دەدى مينيستر.
ديپلوم تابىستاۋ ءراسىمى فەميدا گۇلزارىندا ءوتتى.
«Maqsut Narikbayev University بەرگەن تالىمگەرلىك پەن مۇمكىندىكتەردىڭ ارقاسىندا مەن ۇلكەن كومپانيالاردا تاعىلىمدامادان ءوتىپ, ءتۇرلى كەيس-چەمپيوناتتارعا قاتىستىم. بۇگىندە مەن PwC-تە - اۋديتورلىق قىزمەت كورسەتەتىن Big4 كومپانيالارىنىڭ بىرىندە جۇمىس ىستەپ جاتىرمىن. ۋنيۆەرسيتەت بىزگە مويىماۋدى جانە وزىمىزگە سەنۋدى ۇيرەتتى», دەدى MNU تۇلەگى باقىت ساقىشوۆا.