پرەزيدەنتتىڭ 2023 جىلعى جولداۋىندا ايتىلعان تاپسىرماسىن ورىنداۋ شەڭبەرىندە ۇكىمەت سۋ رەسۋرستارى جانە يرريگاتسيا مينيسترلىگىنە سۋ ۇنەمدەۋ تەحنولوگيالارىن ەنگىزۋگە ارنالعان ينۆەستيتسيالىق سالىمدار كەزىندە سۋ بەرۋ جونىندەگى قىزمەتتەردىڭ قۇنىن سۋبسيديالاۋ جانە شىعىستاردىڭ ءبىر بولىگىن وتەۋ جونىندەگى اۋىل شارۋاشىلىعى مينيسترلىگىنىڭ فۋنكتسيالارىن بەرۋ تۋرالى شەشىم قابىلدادى. تۇتاستاي العاندا, قابىلدانعان فۋنكتسيالار سۋارۋ كەزىندە سۋ ۇنەمدەۋ تەحنولوگيالارىن ەنگىزۋ ەسەبىنەن شارۋالاردىڭ سۋ رەسۋرستارىن ءتيىمدى پايدالانۋ ماسەلەلەرىن كەشەندى شەشۋدى قامتاماسىز ەتەدى, دەپ حابارلايدى Egemen.kz.
2024 جىلى سۋ ۇنەمدەۋ ساياساتىن ودان ءارى ىسكە اسىرۋ جانە فەرمەرلەردى سۋ ۇنەمدەۋ تەحنولوگيالارىنا كوشۋگە ىنتالاندىرۋ ءۇشىن نەگىز قالانىپ, ينفراقۇرىلىمدى جۇرگىزۋ كەزىندە ۇڭعىمالاردى بۇرعىلاۋعا, سونداي-اق سۋ ۇنەمدەۋ تەحنولوگيالارىن ساتىپ الۋعا جانە ورناتۋعا فەرمەرلەردىڭ شىعىندارىن وتەۋ ۇلەسى 50%-دان 80%-عا دەيىن ۇلعايتىلدى, تاريف قۇنىنا بايلانىستى سۋبسيديالاردىڭ سارالانعان مولشەرى ەنگىزىلدى.
ۇكىمەتتىڭ ءباسپاسوز قىزمەتىنىڭ حابارلاۋىنشا اتالعان جاڭا وزگەرىستەردى جۇزەگە اسىرۋ ناتيجە كورسەتتى. 2024 جىلى سۋارۋ كەزىندە سۋ ۇنەمدەۋ تەحنولوگيالارى قولدانىلاتىن القاپتار 158 مىڭ گەكتارعا دەيىن ۇلعايدى: ونىڭ ىشىندە 60 مىڭ گەكتارى جاڭبىرلاتۋ جۇيەلەرىن پايدالانا وتىرىپ سۋارىلسا, 40 مىڭ گەكتارى – تامشىلاتىپ سۋارۋ جانە 58 مىڭ گەكتارى لازەرلىك جوسپارلاۋشىمەن تەگىستەلگەن. اۋىل شارۋاشىلىعى مينيسترلىگىنىڭ دەرەكتەرىنە سايكەس, بىلتىرعى جىلدىڭ قورىتىندىسى بويىنشا سۋ ۇنەمدەۋ تەحنولوگيالارى بار سۋارمالى جەرلەردىڭ جالپى اۋدانى 470,1 مىڭ گەكتاردى قۇراعان.
سونىمەن قاتار 2030 جىلعا قاراي سۋ ۇنەمدەۋ تەحنولوگيالارىن قولدانا وتىرىپ, سۋارمالى جەرلەردىڭ اۋدانىن 1,3 ملن گەكتارعا دەيىن كەڭەيتۋ جوسپارلانىپ وتىر.